ਖਰੜ/ ਮੋਹਾਲੀ,13 ਮਾਰਚ,ਬੋਲੇ ਪੰਜਾਬ ਬਿਊਰੋ :
ਸਿੱਖਿਆ ਦੇ ਖੇਤਰ ਵਿੱਚ ਮੋਹਰੀ ਭੂਮਿਕਾ ਅਦਾ ਕਰ ਰਹੇ ਰਤਨ ਗਰੁੱਪ ਆਫ ਇੰਸਟੀਟਿਊਸ਼ਨ ਵੱਲੋਂ ਗਰੁੱਪ ਦੇ ਐਡਿਟੋਰੀਅਮ ਵਿਖੇ ਮਹਿਲਾ ਸਸ਼ਕਤੀਕਰਨ ਤੇ ਇੱਕ ਵਿਸ਼ੇਸ਼ ਸੈਮੀਨਾਰ ਦਾ ਆਯੋਜਨ ਕਾਲਜ ਚੇਅਰਮੈਨ ਸੁੰਦਰ ਲਾਲ ਅਗਰਵਾਲ ਦੀ ਅਗਵਾਈ ਹੇਠ ਕੀਤਾ ਗਿਆ। ਗਰੁੱਪ ਦੀਆਂ ਵਿਦਿਆਰਥੀਆਂ ਨੂੰ ਪ੍ਰੇਰਿਤ ਕਰਨ ਦੇ ਲਈ ਸੈਮੀਨਾਰ ਦਾ ਵਿਸ਼ਾ “ਇੱਕ ਸਸ਼ਕਤ ਮਹਿਲਾ ਕਿਵੇਂ ਬਣੀਏ” ਰੱਖਿਆ ਗਿਆ । ਪ੍ਰੋਗਰਾਮ ਦੌਰਾਨ ਉੱਘੇ ਸਮਾਜ ਸੇਵੀ ਜਗਜੀਤ ਕੌਰ ਕਾਹਲੋ ਮੁੱਖ ਮਹਿਮਾਨ ਦੇ ਤੌਰ ਤੇ ਹਾਜ਼ਰ ਹੋਏ । ਜਦੋਂ ਕਿ ਸੀਨੀਅਰ ਪੱਤਰਕਾਰ ਅਤੇ ਮੋਟੀਵੇਸ਼ਨਲ ਸਪੀਕਰ ਹਰਦੀਪ ਕੌਰ ਅਤੇ ਡਾਕਟਰ ਦਵਿੰਦਰ ਕੌਰ ਖੁਸ਼ ਧਾਲੀਵਾਲ ਵੱਲੋਂ ਮਹਿਲਾ ਵਿਦਿਆਰਥੀਆਂ ਨੂੰ ਸੰਬੋਧਨ ਕੀਤਾ ਗਿਆ । ਇਸ ਦੌਰਾਨ ਉੱਘੇ ਸਮਾਜ ਸੇਵੀ ਸਤਿੰਦਰ ਕੌਰ , ਪੱਤਰਕਾਰ ਹਰਸਿਮਰਤ ਪੌਲ , ਪੱਤਰਕਾਰ ਸ਼ਾਲੂ ਮਿਰੌਕ ਇਹ ਪੱਤਰਕਾਰ ਤਜਿੰਦਰ ਕੌਰ ਨੂੰ ਰਤਨ ਗਰੁੱਪ ਵੱਲੋਂ “ਧੀ ਪੰਜਾਬ ਦੀ” ਐਵਾਰਡ ਦੇ ਨਾਲ ਸਨਮਾਨਿਤ ਕੀਤਾ ਗਿਆ ।
ਇਸ ਮੌਕੇ ਮੋਟੀਵੇਸ਼ਨਲ ਸਪੀਕਰ ਹਰਦੀਪ ਕੌਰ ਨੇ ਵਿਦਿਆਰਥਣਾ ਨੂੰ ਛੋਟੀਆਂ-ਛੋਟੀਆਂ ਉਦਾਹਰਣਾਂ ਦੇ ਕੇ ਕਿ ਭਵਿੱਖ ਵਿੱਚ ਜਿੱਥੇ ਵਿੱਤੀ ਤੌਰ ਤੇ ਸਸ਼ਕਤ ਹੋਣ ਲਈ ਪ੍ਰੇਰਿਤ ਕੀਤਾ ਉਥੇ ਹੀ ਆਪੋ-ਆਪਣੇ ਖੇਤਰ ਵਿੱਚ ਬੁਲੰਦੀ ਦੀਆਂ ਚੋਟੀਆਂ ਸਰ ਕਰਨ ਲਈ ਵੀ ਕਿਹਾ । ਹਰਦੀਪ ਕੌਰ ਨੇ ਇਸ ਮੌਕੇ ਆਪਣੀ ਬੁਲੰਦ ਆਵਾਜ਼ ਰਾਹੀਂ ਵਿਦਿਆਰਥਣਾਂ ਦੇ ਵਿੱਚ ਜੋਸ਼ ਭਰਦਿਆਂ ਪ੍ਰੋਗਰਾਮ ਨੂੰ ਇੱਕ ਸਿਖਰ ਪ੍ਰਦਾਨ ਕੀਤੀ । ਵਿਦਿਆਰਥਣਾਂ ਦਾ ਜੋਸ਼ ਇਸ ਦੌਰਾਨ ਅੱਖੀ ਵੇਖਿਆਂ ਹੀ ਬਣਦਾ ਸੀ । ਪ੍ਰੋਗਰਾਮ ਦੇ ਅਖੀਰ ਵਿੱਚ ਮੁੱਖ ਮਹਿਮਾਨ ਜਗਜੀਤ ਕੌਰ ਕਾਹਲੋਂ ਵੱਲੋਂ ਪ੍ਰੋਗਰਾਮ ਵਿੱਚ ਭਾਗ ਲੈਣ ਵਾਲੀਆਂ ਸ਼ਖਸ਼ੀਅਤਾਂ ਨੂੰ ਸਨਮਾਨਿਤ ਕੀਤਾ ਗਿਆ । ਇਸ ਮੌਕੇ ਪੱਤਰਕਾਰ ਅਤੇ ਲੋਕ ਗਾਇਕ ਸਤਵਿੰਦਰ ਸਿੰਘ ਧੜਾਕ ਨੇ ਆਪਣਾ ਹਾਲ ਹੀ ਵਿੱਚ ਆਇਆ ਗੀਤ ਸਪੈਸ਼ਲ ਕੁਝ ਖਾਸ ਵੀ ਗਾ ਕੇ ਸੁਣਾਇਆ । ਪੱਤਰਕਾਰ ਡਾਇਰੈਕਟਰ ਅਤੇ ਐਕਟਰ ਕੁਲਵੰਤ ਗਿੱਲ ਵੱਲੋਂ ਵੀ ਇਸ ਸਮੇਂ ਹਾਜਰੀਨ ਦੇ ਨਾਲ ਵਿਚਾਰਾਂ ਦੀ ਸਾਂਝ ਪਾਈ ਗਈ । ਪ੍ਰੋਗਰਾਮ ਵਿੱਚ ਵੱਡੀ ਗਿਣਤੀ ਵਿੱਚ ਹਾਜ਼ਰ ਵਿਦਿਆਰਥੀਆਂ ਦੇ ਨਾਲ ਰਤਨ ਗਰੁੱਪ ਦੇ ਫੈਕਲਟੀ ਮੈਂਬਰ ਵਾਈਸ ਪ੍ਰਿੰਸੀਪਲ ਹੀਰਾ ਮਨੀ ਤੋਂ ਇਲਾਵਾ ਉਚੇਚੇ ਤੌਰ ਤੇ ਪੱਤਰਕਾਰ ਅਤੇ ਸਮਾਜ ਸੇਵੀ ਤਿਲਕ ਰਾਜ , ਮੈਡਮ ਡਿੰਪਲ , ਪੱਤਰਕਾਰ ਉਮਾ ਰਾਵਤ, ਮਨਪ੍ਰੀਤ ਕੌਰ ਅਤੇ ਅਮਨ ਹਾਜਰ ਸਨ।
