ਪੰਜਾਬ ਵਿਧਾਨ ਸਭਾ 2022 ਦੀਆਂ ਚੋਣਾਂ ਚ ਆਮ ਆਦਮੀ ਪਾਰਟੀ ਵੱਲੋਂ ਸੂਬੇ ਦੀਆਂ ਮਹਿਲਾਵਾਂ ਨਾਲ ਵਾਅਦਾ ਕੀਤਾ ਗਿਆ ਸੀ ਕੇ ਜੇਕਰ ਉਨਾਂ ਦੀ ਪਾਰਟੀ ਸਤ੍ਹਾ ਚ ਆਈ ਤਾਂ ਹਰ ਮਹੀਨੇ ਉਨਾਂ ਨੂੰ 1000 ਰੁਪਏ ਮਹੀਨਾ ਦਿੱਤਾ ਜਾਵੇਗਾ।ਫਿਰ ਸਰਕਾਰ ਬਣਨ ਦੇ ਦੋ ਸਾਲ ਪਿੱਛੋਂ ਮਾਣਯੋਗ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਵੱਲੋਂ ਇਹ ਐਲਾਨ ਕੀਤਾ ਗਿਆ ਕੇ ਹੁਣ ਮਹਿਲਾਵਾਂ ਨੂੰ ਇੱਕ ਹਜ਼ਾਰ ਦੀ ਥਾਂ ਹੁਣ 1100 ਰੁਪਏ ਦਿੱਤੇ ਜਾਣਗੇ।
ਪਰ ਤਿੰਨ ਸਾਲ ਬੀਤ ਜਾਣ ਪਿੱਛੋਂ ਵੀ ਹਾਲੇ ਤੱਕ ਇਹ ਵਾਅਦਾ ਵਫ਼ਾ ਨਹੀਂ ਹੋਇਆ ।
ਉਧਰ ਦਿੱਲੀ ਚ ਬਣੀ ਨਵੀਂ ਬੀਜੇਪੀ ਸਰਕਾਰ ਵੱਲੋਂ ਚੋਣਾਂ ਦੌਰਾਨ ਕੀਤੇ ਵਾਅਦੇ ਮੁਤਾਬਕ ਲੰਘੀ 8 ਮਾਰਚ ਨੂੰ ਮਹਿਲਾ ਦਿਵਸ ਉੱਤੇ ਮਹਿਲਾਵਾਂ ਨੂੰ 2500 ਰੁਪਏ ਪ੍ਰਤੀ ਮਹੀਨਾ ਦੇਣ ਦੇ ਫ਼ੈਸਲੇ ਨੂੰ ਅਮਲੀ ਜਾਮਾ ਪਹਿਨਾਉਣ ਵਾਸਤੇ ਮਾਣਯੋਗ ਮੁੱਖ ਮੰਤਰੀ ਰੇਖਾ ਗੁਪਤਾ ਵੱਲੋਂ ਇੱਕ ਚਾਰ ਮੈਂਬਰੀ ਕਮੇਟੀ ਗਠਿਤ ਕੀਤੀ ਗਈ ।ਜੋ ਇਹ ਤਹਿ ਕਰੇਗੀ ਕਰੇਗੀ ਕੇ ਕਿਸ ਮਹਿਲਾ ਦੇ ਖਾਤੇ ਚ 25 ਸੌ ਰੁਪਏ ਪਾਏ ਜਾਣੇ ਹਨ।ਭਾਂਵੇਂ ਕੇ ਚੋਣਾਂ ਦੌਰਾਨ ਭਾਜਪਾ ਵਲੋਂ ਦਿੱਲੀ ਦੀਆਂ ਸਮੁੱਚੀਆਂ ਮਹਿਲਾਵਾਂ ਨੂੰ ਇਹ ਰਾਸ਼ੀ ਦਿੱਤੇ ਜਾਣ ਦਾ ਵਾਅਦਾ ਕੀਤਾ ਗਿਆ ਸੀ।ਪਰ ਹੁਣ ਸਰਕਾਰ ਬਣਨ ਮਗਰੋਂ ਬੀਜੇਪੀ ਕੁਝ ਪਿੱਛੇ ਹਟਦੀ ਵਿਖਾਈ ਦੇ ਰਹੀ ਹੈ।ਦਿੱਲੀ ਚ ਕੁੱਲ ਮਹਿਲਾ ਵੋਟਰਾਂ ਦੀ ਗਿਣਤੀ 72ਲੱਖ ਦੇ ਕਰੀਬ ਹੈ।ਪਰ ਜੋ ਹੁਣ ਮਾਪ ਦੰਡ ਅਪਣਾਏ ਜਾ ਰਹੇ ਹਨ।ਉਸ ਮੁਤਾਬਕ 18ਤੋ 60 ਸਾਲ ਦੀਆਂ ਔਰਤਾਂ ਨੂੰ ਹੀ 2500ਰੁਪਏ ਪ੍ਰਤੀ ਮਹੀਨਾ ਦਿੱਤਾ ਜਾਣਾ ਹੈ।ਇਸ ਤੋਂ ਬਿਨਾ ਸਰਕਾਰੀ ਨੌਕਰੀ ਮਹਿਲਾਵਾਂ ਨੂੰ ਵੀ ਇਸ ਘੇਰੇ (2500 ਰੁਪਈਏ )ਤੋਂ ਬਾਹਰ ਰੱਖਿਆ ਗਿਆ ਹੈ।ਉਨਾਂ ਮਹਿਲਾਵਾਂ ਨੂੰ ਵੀ ਇਸ ਦਾ ਲਾਭ ਨਹੀਂ ਮਿਲ ਸਕੇਗਾ ਜਿਨਾਂ ਦੀ ਸਲਾਨਾ ਆਮਦਨ 3 ਲੱਖ ਤੋਂ ਉਪਰ ਹੋਵੇਗੀ ਜਾ ਉਸਦਾ ਪਰਵਾਰ ਇਨਕਮ ਟੈਕਸ ਭਰਦਾ ਹੋਵੇਗਾ।।ਇਸ ਤਰਾਂ ਕੱਟ ਕਟਾ ਕੇ ਬਾਕੀ 20 ਲੱਖ ਦੇ ਕਰੀਬ ਹੀ ਮਹਿਲਾਵਾਂ ਰਹਿ ਜਾਂਦੀਆਂ ਹਨ।ਜਿਨਾਂ ਨੂੰ ਇਸ ਸਕੀਮ ਦਾ ਲਾਭ ਮਿਲ ਸਕੇਗਾ।ਚਲੋ ਖੈਰ !ਫਿਰ ਵੀ ਬੀਜੇਪੀ ਵੱਲੋਂ ਸਤ੍ਹਾ ਸੰਭਾਲਣ ਦੇ ਕੁਝ ਦਿਨਾਂ ਪਿੱਛੋਂ ਹੀ ਵਾਅਦਾ ਨਿਭਾਉਣ ਦੀ ਕਾਰਵਾਈ ਨੂੰ ਸ਼ਲਾਘਾਯੋਗ ਜਰੂਰ ਆਖਿਆ ਜਾ ਸਕਦਾ ਹੈ।
ਪੰਜਾਬ ਚ 2024 ਦੀ ਵੋਟਰ ਸੂਚੀ ਅਨੁਸਾਰ ਮਹਿਲਾ ਵੋਟਰਾਂ ਦੀ ਗਿਣਤੀ 1ਕਰੋੜ ਇਕ ਲੱਖ 74 ਹਜ਼ਾਰ 240 ਹੈ।ਜੇ ਕਰ ਚੁਣਾਵੀ ਵਾਅਦੇ ਮੁਤਾਬਕ ਸਾਰੀਆਂ ਮਹਿਲਾਵਾਂ ਨੂੰ ਇਹ 1000 ਰੁਪਏ ਮਹੀਨਾ ਦਿੱਤਾ ਜਾਂਦਾ ਹੈ ਤਾ ਇਸ ਨਾਲ ਸੂਬੇ ਦੇ ਖ਼ਜ਼ਾਨੇ ਉੱਤੇ ਅਰਬਾਂ ਰੁਪਏ ਦਾ ਬੋਝ ਪਵੇਗਾ।ਪਹਿਲਾਂ ਹੀ ਸਾਢੇ ਤਿੰਨ ਲੱਖ ਕਰੋੜ ਤੋਂ ਵਧ ਦੇ ਕਰਜ਼ੇ ਦੇ ਬੋਝ ਦੀ ਮਾਰ ਝੱਲ ਰਿਹਾ ਪੰਜਾਬ ਇਹ ਪੈਸਾ ਕਿੱਥੋਂ ਲਿਆਵੇਗਾ? ਇਹ ਸੂਬੇ ਦੀ ਆਰਥਕਤਾ ਨਾਲ ਜੁੜਿਆ ਇੱਕ ਵੱਡਾ ਸਵਾਲ ਹੈ।
ਪਰ ਪੰਜਾਬ ਦੀ ਆਮ ਆਦਮੀ ਪਾਰਟੀ ਵੱਲੋਂ 3 ਵਰ੍ਹੇ ਬੀਤਣ ਦੇ ਬਾਵਜੂਦ ਅਜੇ ਤੱਕ ਵਾਅਦੇ ਮੁਤਾਬਕ ਸੂਬੇ ਦੀਆਂ ਮਹਿਲਾਵਾਂ ਨੂੰ 1000 ਰੁਪਏ ਪ੍ਰਤੀ ਮਹੀਨਾ ਨਹੀਂ ਦਿੱਤਾ ਗਿਆ ਬਲਕੇ ਲਾਰੇ ਲਾ ਕੇ ਡੰਗ ਟਪਾਇਆ ਜਾ ਰਿਹਾ ਹੈ।।ਜਿਸ ਨਾਲ ਮਹਿਲਾਵਾਂ ਚ ਮਾਨ ਸਰਕਾਰ ਖਿਲਾਫ ਗੁੱਸੇ ਦਾ ਲਾਵਾ ਪਨਪ ਰਿਹਾ ਹੈ ।ਜਦ ਕੇ ਸਰਕਾਰ ਦੇ ਕਾਰਜਕਾਲ ਦੇ ਮਹਿਜ ਦੋ ਵਰ੍ਹੇ ਬਾਕੀ ਬਚੇ ਹਨ।ਇਸ ਦੇ ਬਾਵਜੂਦ ਸਰਕਾਰ ਮਹਿਲਾਵਾਂ ਨਾਲ ਕੀਤੇ ਵਾਅਦੇ ਨੂੰ ਪੂਰਾ ਕਰਨ ਲਈ ਗੰਭੀਰ ਵਿਖਾਈ ਨਹੀਂ ਦੇ ਰਹੀ।ਸਵਾਲ ਉੱਠਦਾ ਹੈ ਕੇ ਜੇ ਕਰ ਸਰਕਾਰ ਆਪਣੇ ਕਾਰਜਕਾਲ ਦੇ ਅੰਤਮ ਵਰ੍ਹੇ ਇੰਨਾ ਨੂੰ ਹਜਾਰ ਰੁਪਏ ਦੇ ਵੀ ਦਿੰਦੀ ਹੈ ਤਾਂ ਕੀ ਪਿਛਲਾ ਬਕਾਇਆ ਦੇਵੇਗੀ ? ਕੀ ਪੰਜਾਬ ਸਰਕਾਰ ਨੇ ਤਿੰਨ ਵਰ੍ਹੇ ਬੀਤਣ ਦੇ ਬਾਵਜੂਦ ਮਹਿਲਾਵਾਂ ਨੂੰ ਹਜਾਰ ਰੁਪਏ ਮਹੀਨਾ ਨਾ ਦੇ ਕੇ ਉਨਾਂ ਨਾਲ ਵਾਅਦਾ ਖਿਲਾਫੀ ਜਾਂ ਧੋਖਾ ਨਹੀਂ ਕੀਤਾ ?
ਉਧਰ 11 ਮਹੀਨਿਆਂ ਤੱਕ ਸੂਬੇ ਅੰਦਰ ਮਿਊਂਸੀਪਲ ਚੋਣਾਂ ਆ ਰਹੀਆਂ ਹਨ । ਕੀ ਇੰਨਾ ਚੋਣਾਂ ਤੋ ਪਹਿਲਾਂ ਪਹਿਲਾਂ ਪੰਜਾਬ ਸਰਕਾਰ ਮਹਿਲਾਵਾਂ ਨੂੰ 1000 ਮਹੀਨਾ ਦੇਵੇਗੀ ਜਾਂ ਫਿਰ ਵਾਅਦਾ ਬੇਵਫਾ ਹੋਵੇਗਾ ? ਦਿੱਲੀ ਹਾਰਨ ਮਗਰੋਂ ਆਮ ਆਦਮੀ ਪਾਰਟੀ ਦੀ ਸਰਕਾਰ ਹੁਣ ਕੇਵਲ ਇਕੋ ਇਕ ਸੂਬੇ ਪੰਜਾਬ ਚ ਰਹਿ ਗਈ ਹੈ।ਉਸ ਨੂੰ ਲੈ ਕੇ ਜੇ ਸਰਕਾਰ ਨੇ ਆਪਣੇ ਵਾਅਦੇ ਪੂਰੇ ਨਾ ਕੀਤੇ ਤਾਂ 2027 ਚ ਪੰਜਾਬ ਚ ਸਰਕਾਰ ਦਾ ਬੋਰੀ ਬਿਸਤਰਾ ਗੋਲ ਹੋਣਾ ਤਹਿ ਹੈ।
ਪਾਠਕਾਂ ਨੂੰ ਯਾਦ ਹੋਵੇਗਾ ਜਦੋਂ ਆਪ ਹੋਂਦ ਚ ਆਈ ਸੀ ਉਸ ਸਮੇਂ ਇਸ ਦੇ ਸੰਵਿਧਾਨ ਚ ਤਿੰਨ ਸੀਸੀਸੀ ਉੱਤੇ ਪਹਿਰਾ ਦੇਣ ਦੀ ਗੱਲ ਬੜੀ ਠੋਕ ਵਜਾ ਕੇ ਕਹੀ ਗਈ ਸੀ।ਜਿਸ ਦਾ ਮਤਲਬ ਹੈ ਪਾਰਟੀ ਚ ਕੋਈ ਕਰੱਪਟ ਨਹੀਂ ਹੋਵੇਗਾ,ਕੋਈ ਕ੍ਰਿਮੀਨਲ ਨਹੀਂ ਹੋਵੇਗਾ ਕੋਈ ਕਰੈਕਟਰਲੈੱਸ ਨਹੀਂ ਹੋਏਗਾ।ਪਰ ਇਸ ਦੇ ਉਲਟ ਆਮ ਆਦਮੀ ਪਾਰਟੀ ਟ੍ਰਿੱਪਲ ਸੀ ਤੋਂ ਨਾ ਸਿਰਫ ਸੱਖਣੀ ਹੈ।ਸਗੋਂ ਟ੍ਰਿੱਪਲ ਸੀ ਵਿੱਚ ਪੂਰੀ ਤਰਾਂ ਲਿੱਬੜ ਚੁੱਕੀ ਹੈ ਜਾਂ ਇਹ ਕਹਿ ਲਵੋ ਕੇ ਇਹ ਤਿੰਨੇ ਗੱਲਾਂ ਨਾਲ ਲਥਪਥ ਹੋ ਚੁੱਕੀ ਹੈ।
ਹੁਣ ਵੇਖਣਾ ਇਹ ਹੋਵੇਗਾ ਕੇ ਸਰਕਾਰ ਸੂਬੇ ਦੀਆਂ ਮਹਿਲਾਵਾਂ ਨਾਲ ਕੀਤਾ ਉਕਤ ਵਾਅਦਾ ਕਦੋਂ ਤੱਕ ਪੂਰਾ ਕਰਦੀ ਹੈ?
ਲੈਕਚਰਾਰ ਅਜੀਤ ਖੰਨਾ
ਮੋਬਾਈਲ :76967-54669
