ਜਲੰਧਰ, 4 ਫਰਵਰੀ,ਬੋਲੇ ਪੰਜਾਬ ਬਿਊਰੋ :
ਜਲੰਧਰ ਦੀ ਇੱਕ ਮਹਿਲਾ ਕਾਰੋਬਾਰੀ ਨੇ ਮਹਾਕੁੰਭ ਪਹੁੰਚ ਕੇ ਵੱਡਾ ਐਲਾਨ ਕਰ ਦਿੱਤਾ ਹੈ। ਪ੍ਰਯਾਗਰਾਜ ਵਿੱਚ ਮਹਾਕੁੰਭ ਦੌਰਾਨ ਇਸ ਮਹਿਲਾ ਨੇ ਇਸਨਾਨ ਕਰਨ ਉਪਰੰਤ ਆਪਣਾ ਸਭ ਕੁਝ ਤਿਆਗਣ ਦਾ ਫੈਸਲਾ ਲਿਆ ਹੈ। ਗੌਰਤਲਬ ਹੈ ਕਿ ਇਸ ਮਹਿਲਾ ਦਾ ਜਲੰਧਰ ਵਿੱਚ ਇਤਰ (ਪਰਫਿਊਮ) ਦਾ ਵਪਾਰ ਸੀ, ਜਿਸ ਨੂੰ ਉਸਨੇ ਆਪਣੇ ਬੇਟੇ ਨੂੰ ਸੌਂਪ ਦਿੱਤਾ ਹੈ। ਇਸਦੇ ਨਾਲ ਹੀ, ਉਹਨੇ ਆਪਣੇ ਘਰ ਦੀ ਪੂਰੀ ਜ਼ਿੰਮੇਵਾਰੀ ਵੀ ਆਪਣੇ ਬੇਟੇ ਨੂੰ ਹੀ ਦੇ ਦਿੱਤੀ ਹੈ।
ਕਿਹਾ ਜਾ ਰਿਹਾ ਹੈ ਕਿ ਉਕਤ ਕਾਰੋਬਾਰੀ ਮਹਿਲਾ ਪ੍ਰਯਾਗਰਾਜ ਪਹੁੰਚ ਕੇ ਪੂਰੀ ਤਰ੍ਹਾਂ ਆਧਿਆਤਮਿਕਤਾ ਵਿੱਚ ਲੀਨ ਹੋ ਗਈ ਅਤੇ ਉਨ੍ਹਾਂ ਨੇ ਸ਼੍ਰੀ 1008 ਮਹਾਮੰਡਲੇਸ਼ਵਰ ਸੁਆਮੀ ਚਰਣਾਸ਼੍ਰਿਤ ਗਿਰੀ ਜੀ ਮਹਾਰਾਜ ਦੀ ਸਰਨ ਲੈ ਲਈ। ਹੁਣ ਉਹ ਮਹਾਕੁੰਭ ਵਿੱਚ ਲੋਕਾਂ ਨੂੰ ਸਵਰ ਯੋਗ ਸਾਧਨਾ ਦੀ ਸਿੱਖਿਆ ਦੇ ਰਹੀ ਹਨ।
ਉਕਤ ਮਹਿਲਾ ਦੀ ਪਹਿਚਾਣ ਸ਼ਵੇਤਾ ਚੋਪੜਾ (ਉਮਰ 50 ਸਾਲ), ਨਿਵਾਸੀ ਸਿਲਵਰ ਹਾਈਟਸ ਕਾਲੋਨੀ, ਜਲੰਧਰ ਵਜੋਂ ਹੋਈ ਹੈ, ਜੋ ਹੁਣ ਅਨੰਤਾ ਗਿਰੀ ਬਣ ਚੁੱਕੀ ਹਨ। ਉਨ੍ਹਾਂ ਦਾ 1996 ਵਿੱਚ ਇੱਕ ਪਰਫਿਊਮ ਕਾਰੋਬਾਰੀ ਨਾਲ ਵਿਆਹ ਹੋਇਆ ਸੀ ਅਤੇ ਉਨ੍ਹਾਂ ਦਾ ਇੱਕ ਬੇਟਾ ਵੀ ਹੈ।
ਜਾਣਕਾਰੀ ਅਨੁਸਾਰ, 2012 ਵਿੱਚ ਉਨ੍ਹਾਂ ਦੇ ਪਤੀ ਦੀ ਮੌਤ ਨਸ਼ਿਆਂ ਕਾਰਨ ਹੋ ਗਈ ਸੀ।ਇਸ ਦੁੱਖਦਾਈ ਘੜੀ ਤੋਂ ਬਾਅਦ, ਉਨ੍ਹਾਂ ਨੇ ਆਪਣਾ ਪਰਿਵਾਰਕ ਵਪਾਰ ਸੰਭਾਲਿਆ ਅਤੇ ਆਪਣੇ ਇਕਲੌਤੇ ਪੁੱਤਰ ਸੰਚਿਤ ਅਰੋੜਾ ਨੂੰ ਵੱਡਾ ਕੀਤਾ। ਪਰ ਉਹ ਸ਼ਾਂਤੀ ਦੀ ਖੋਜ ਵਿੱਚ ਸਰਗਰਮ ਸਨ, ਜੋ ਉਨ੍ਹਾਂ ਨੂੰ ਮਹਾਕੁੰਭ ਵਿੱਚ ਮਿਲੀ, ਅਤੇ ਉਨ੍ਹਾਂ ਨੇ ਸਾਧਵੀ ਬਣਨ ਦਾ ਐਲਾਨ ਕਰ ਦਿੱਤਾ।
