ਮੈਕਸੀਕੋ ਦੇ ਇੱਕ ਬਾਰ ‘ਚ ਗੋਲੀਬਾਰੀ, ਛੇ ਵਿਅਕਤੀਆਂ ਦੀ ਮੌਤ
ਤਾਬਾਸਕੋ, 25 ਨਵੰਬਰ,ਬੋਲੇ ਪੰਜਾਬ ਬਿਊਰੋ ;
ਦੱਖਣ-ਪੂਰਬੀ ਮੈਕਸੀਕੋ ’ਚ ਕੁਝ ਹਥਿਆਰਬੰਦ ਵਿਅਕਤੀਆਂ ਵਲੋਂ ਇੱਕ ਬਾਰ ’ਚ ਗੋਲੀਆਂ ਚਲਾਉਣ ਦੀ ਖਬਰ ਆਈ ਹੈ ।ਇਸ ਗੋਲੀਬਾਰੀ ਕਾਰਨ ਛੇ ਵਿਅਕਤੀਆਂ ਦੀ ਮੌਤ ਅਤੇ ਪੰਜ ਜ਼ਖਮੀ ਹੋ ਗਏ। ਸਥਾਨਕ ਮੀਡੀਆ ਦੀਆਂ ਰਿਪੋਰਟਾਂ ’ਚ ਇਹ ਜਾਣਕਾਰੀ ਦਿੱਤੀ ਗਈ।
ਖ਼ਬਰਾਂ ਮੁਤਾਬਕ ਗੋਲੀਬਾਰੀ ਦੀ ਇਹ ਘਟਨਾ ਤੱਟੀ ਸੂਬੇ ਤਾਬਾਸਕੋ ’ਚ ਵਾਪਰੀ। ਜਨਤਕ ਸੁਰੱਖਿਆ ਸਕੱਤਰ ਉਮਰ ਗਾਰਸੀਆ ਹਾਰਫੁਕ ਨੇ ਐਕਸ ’ਤੇ ਕਿਹਾ ਕਿ ਗੋਲੀਬਾਰੀ ਦੀ ਘਟਨਾ ਵਿਲਾਹੇਰਮੋਸਾ ’ਚ ਵਾਪਰੀ ਅਤੇ ਸੰਘੀ ਪ੍ਰਸ਼ਾਸਨ ਵੱਲੋਂ ਸਥਾਨਕ ਅਧਿਕਾਰੀਆਂ ਦੀ ਮਦਦ ਨਾਲ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਮਾਮਲੇ ਸਬੰਧੀ ਹਾਲੇ ਤੱਕ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਅਤੇ ਨਾ ਹੀ ਗੋਲੀਬਾਰੀ ਪਿੱਛੇ ਕਾਰਨ ਦਾ ਪਤਾ ਲੱਗਾ ਹੈ।
