ਲੁਧਿਆਣਾ : ਸਿਲੰਡਰ ਰੀਫੀਲਿੰਗ ਦੌਰਾਨ ਅੱਗ ਲੱਗਣ ਕਾਰਨ ਸੱਤ ਵਿਅਕਤੀ ਝੁਲਸੇ
ਲੁਧਿਆਣਾ, 16 ਅਕਤੂਬਰ,ਬੋਲੇ ਪੰਜਾਬ ਬਿਊਰੋ :
ਲੁਧਿਆਣਾ ਵਿਖੇ ਗਿਆਸਪੁਰਾ ਦੀ ਸਮਰਾਟ ਕਾਲੋਨੀ ਦੀ ਗਲੀ ਨੰਬਰ ਤਿੰਨ ‘ਚ ਦੇਰ ਰਾਤ ਸਿਲੰਡਰ ‘ਚ ਗੈਸ ਭਰਨ ਦੌਰਾਨ ਲੀਕੇਜ ਹੋਣ ਕਾਰਨ ਅੱਗ ਲੱਗ ਗਈ। ਅੱਗ ਲੱਗਣ ਤੋਂ ਬਾਅਦ ਦਹਿਸ਼ਤ ਫੈਲ ਗਈ।
ਇਸ ਦੌਰਾਨ ਸੱਤ ਸਾਲਾ ਬੱਚੀ ਸ਼ਿਵਾਨੀ ਅਤੇ ਉਸ ਦੀ 35 ਸਾਲਾ ਮਾਂ ਫੂਲਵਤੀ ਝੁਲਸ ਗਈਆਂ। ਉਨ੍ਹਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਦੌਰਾਨ ਪੰਜ ਹੋਰ ਲੋਕ ਵੀ ਝੁਲਸ ਗਏ।ਜ਼ਖਮੀ ਮਾਂ-ਧੀ ਨੂੰ ਸਿਵਲ ਹਸਪਤਾਲ ਅਤੇ ਬਾਕੀਆਂ ਨੂੰ ਨਿੱਜੀ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ ਹੈ।ਅੱਗ ਨੇ ਰਸੋਈ ਦੇ ਆਲੇ-ਦੁਆਲੇ ਦੇ ਚਾਰ ਕਮਰਿਆਂ ਨੂੰ ਵੀ ਆਪਣੀ ਲਪੇਟ ਵਿਚ ਲੈ ਲਿਆ ਅਤੇ ਉਥੇ ਪਿਆ ਸਾਮਾਨ ਵੀ ਸੜ ਗਿਆ।
ਮਹਿਲਾ ਦੇ ਪਤੀ ਦਰੋਗਾ ਪ੍ਰਸਾਦ ਨੇ ਦੱਸਿਆ ਕਿ ਉਹ ਸਮਰਾਟ ਕਲੋਨੀ ਵਿੱਚ ਰਹਿੰਦੇ ਹਨ। ਇੱਕ ਵਿਅਕਤੀ ਵੱਡੇ ਸਿਲੰਡਰ ਤੋਂ ਛੋਟੇ ਸਿਲੰਡਰ ਵਿੱਚ ਗੈਸ ਭਰਦਾ ਹੈ। ਦੇਰ ਸ਼ਾਮ ਜਦੋਂ ਉਸ ਦੀ ਪਤਨੀ ਖਾਣਾ ਬਣਾ ਰਹੀ ਸੀ ਤਾਂ ਨਾਲ ਵਾਲੇ ਕਮਰੇ ਵਿੱਚ ਸਿਲੰਡਰ ਰੀਫਿਲ ਕੀਤਾ ਜਾ ਰਿਹਾ ਸੀ। ਫਿਰ ਗੈਸ ਲੀਕ ਹੋਣ ਕਾਰਨ ਅੱਗ ਲੱਗ ਗਈ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਵੱਡੀ ਗਿਣਤੀ ‘ਚ ਲੋਕ ਇਕੱਠੇ ਹੋ ਗਏ। ਲੋਕਾਂ ਨੇ ਪਾਣੀ ਪਾ ਕੇ ਬੜੀ ਮੁਸ਼ਕਲ ਨਾਲ ਅੱਗ ’ਤੇ ਕਾਬੂ ਪਾਇਆ।
