ਫਰੀਦਾਬਾਦ, 7 ਮਾਰਚ, ਬੋਲੇ ਪੰਜਾਬ ਬਿਊਰੋ
ਹਰਿਆਣਾ ਦੇ ਫਰੀਦਾਬਾਦ ‘ਚ ਇੱਕ ਦਰਦਨਾਕ ਹਾਦਸਾ ਵਾਪਰਿਆ, ਜਦ ਇੱਕ ਪਰਿਵਾਰ ਵਿਆਹ ਤੋਂ ਵਾਪਸੀ ਦੌਰਾਨ ਬਾਈਕ ਸਮੇਤ ਨਾਲੇ ‘ਚ ਜਾ ਡਿੱਗਿਆ। ਇਸ ਹਾਦਸੇ ‘ਚ ਦੋ ਮਾਸੂਮਾਂ ਦੀ ਡੁੱਬਣ ਕਾਰਨ ਮੌਤ ਹੋ ਗਈ, ਜਦਕਿ ਮਾਪਿਆਂ ਸਮੇਤ ਉਨ੍ਹਾਂ ਦੀ ਧੀ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ।ਮਿਲੀ ਜਾਣਕਾਰੀ ਮੁਤਾਬਕ, ਫਰੀਦਾਬਾਦ ਦੇ ਰਾਜੀਵ ਕਾਲੋਨੀ ਨਿਵਾਸੀ ਦਾਤਾਰਾਮ ਆਪਣੀ ਪਤਨੀ ਰਜਨੀ ਅਤੇ ਤਿੰਨ ਬੱਚਿਆਂ ਸਾਕਸ਼ੀ (8), ਮੀਨਾਕਸ਼ੀ (6) ਅਤੇ ਨਿਖਿਲ (4) ਦੇ ਨਾਲ ਤਿਗਾਂਵ ‘ਚ ਵਿਆਹ ‘ਚ ਸ਼ਾਮਲ ਹੋਣ ਗਿਆ ਸੀ। ਰਾਤ ਕਰੀਬ 10 ਵਜੇ, ਜਦ ਉਹ ਪਰਤ ਰਿਹਾ ਸੀ, ਤਿਗਾਂਵ ਪੁਲ ਨੇੜੇ ਸੜਕ ਦੀ ਖਸਤਾ ਹਾਲਤ ਕਾਰਨ ਉਸ ਦੀ ਬਾਈਕ ਅਸੰਤੁਲਿਤ ਹੋ ਗਈ ਅਤੇ ਪੂਰਾ ਪਰਿਵਾਰ ਨਾਲੇ ‘ਚ ਜਾ ਡਿੱਗਿਆ।ਹਾਦਸੇ ਦੀ ਆਵਾਜ਼ ਸੁਣ ਕੇ ਆਸ-ਪਾਸ ਦੇ ਲੋਕਾਂ ਨੇ ਤੁਰੰਤ ਹੀ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤਾ। ਲੋਕਾਂ ਨੇ ਦਾਤਾਰਾਮ, ਰਜਨੀ ਅਤੇ 6 ਸਾਲਾ ਮੀਨਾਕਸ਼ੀ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ, ਪਰ ਛੋਟੇ ਬੱਚੇ ਸਾਕਸ਼ੀ ਅਤੇ ਨਿਖਿਲ ਪਾਣੀ ‘ਚ ਡੁੱਬ ਗਏ। ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਦੋਵੇਂ ਬੱਚਿਆਂ ਦੀਆਂ ਲਾਸ਼ਾਂ ਡਰੇਨ ‘ਚੋਂ ਬਾਹਰ ਕੱਢੀਆਂ, ਜਿਨ੍ਹਾਂ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਭੇਜ ਦਿੱਤਾ ਗਿਆ ਹੈ।ਪੁਲਿਸ ਹਾਦਸੇ ਦੀ ਜਾਂਚ ਕਰ ਰਹੀ ਹੈ।
