ਮਸ਼ਹੂਰ ਲੱਕੜ ਕਾਰੋਬਾਰੀ ਉੱਦਮੀ ਪਰਿਵਾਰ ਅਤੇ ਜੈਨ ਐਂਡ ਕੰਪਨੀ ਵੱਲੋਂ ਸਰਕਾਰੀ ਸਕੂਲਾਂ ਦੀਆਂ 30 ਦੇ ਕਰੀਬ ਲੜਕੀਆਂ ਨੂੰ ਸਾਇਕਲ ਵੰਡੇ
ਮਸ਼ਹੂਰ ਕੱਵਾਲ ਨਸੀਰ ਸਹਾਰਨਪੁਰ ਵਾਲਿਆਂ ਨੇ ਕੱਵਾਲੀਆਂ ਗਾ ਕੇ ਸੰਗਤਾਂ ਨੂੰ ਝੂਮਣ ਲਾ ਦਿੱਤਾ
ਪੀਰ ਬਾਬਾ ਜੀ ਦੇ ਜਨਮ ਦਿਵਸ ਦੀ ਖੁਸ਼ੀ ਵਿੱਚ ਭੰਡਾਰਾ ਵੀ ਅਤੁੱਟ ਵਰਤਾਇਆ ਗਿਆ
ਰਾਜਪੁਰਾ, 5 ਮਾਰਚ ,ਬੋਲੇ ਪੰਜਾਬ ਬਿਊਰੋ :
ਰਾਜਪੁਰਾ ਵਿਖੇ ਪੀਰ ਬਾਬਾ ਮਾਸੂਮ ਅਲੀ ਸ਼ਾਹ ਜੀ ਦਾ ਸਾਲਾਨਾ ਦਿਵਸ ਉਤਸ਼ਾਹ ਅਤੇ ਧਾਰਮਿਕ ਸ਼ਰਧਾ ਨਾਲ ਬੱਬੂ ਭਗਤ ਜੀ ਅੰਬਾਲਾ ਵਾਲਿਆਂ ਦੀ ਅਗਵਾਈ ਹੇਠ ਮਨਾਇਆ ਗਿਆ। ਇਸ ਮੌਕੇ ‘ਤੇ ਹਜ਼ਾਰਾਂ ਭਗਤਜਨਾਂ ਨੇ ਹਾਜ਼ਰੀ ਭਰੀ ਅਤੇ ਪੀਰ ਬਾਬਾ ਜੀ ਦੀ ਬਖ਼ਸ਼ਿਸ਼ ਲਈ ਅਰਦਾਸਾਂ ਕੀਤੀਆਂ। ਸਾਰਾ ਸਮਾਗਮ ਆਧਿਆਤਮਿਕ ਅਤੇ ਧਾਰਮਿਕ ਮਾਹੌਲ ਵਿੱਚ ਵਿਸ਼ੇਸ਼ ਭਾਵਨਾਵਾਂ ਨਾਲ ਭਰਿਆ ਹੋਇਆ ਸੀ।
ਇਸ ਖੁਸ਼ੀ ਦੇ ਮੌਕੇ ‘ਤੇ ਮਸ਼ਹੂਰ ਲੱਕੜ ਕਾਰੋਬਾਰੀ ਸੁਸ਼ੀਲ ਜੈਨ, ਵਿਮਲ ਜੈਨ ਪ੍ਰਧਾਨ ਰੋਟਰੀ ਕਲੱਬ ਰਾਜਪੁਰਾ ਪ੍ਰਾਇਮ, ਰਾਕੇਸ਼ ਜੈਨ, ਗੌਰਵ ਜੈਨ, ਸਮੂਹ ਜੈਨ ਪਰਿਵਾਰ ਅਤੇ ਜੈਨ ਐਂਡ ਕੰਪਨੀ ਵੱਲੋਂ ਸਮਾਜਿਕ ਉਪਰਾਲਾ ਕੀਤਾ ਗਿਆ, ਜਿਸ ਅਧੀਨ 2 ਸਰਕਾਰੀ ਸਕੂਲਾਂ ਦੀਆਂ ਲਗਭਗ 30 ਲੜਕੀਆਂ ਨੂੰ ਸਾਇਕਲਾਂ ਵੰਡੀਆਂ ਗਈਆਂ। ਸਮਾਜ ਸੇਵੀ ਰੋਟੇਰੀਅਨ ਰਾਜਿੰਦਰ ਸਿੰਘ ਚਾਨੀ ਨੇ ਕਿਹਾ ਕਿ ਇਹ ਉਪਰਾਲਾ ਵਿਦਿਆਰਥਣਾਂ ਦੀ ਸਹੂਲਤ ਅਤੇ ਸਿੱਖਿਆ ਪ੍ਰਤੀ ਉਨ੍ਹਾਂ ਦੇ ਜਜ਼ਬੇ ਨੂੰ ਹੋਰ ਉਤਸ਼ਾਹਤ ਕਰੇਗਾ। ਲਾਭਪਾਤਰੀ ਲੜਕੀਆਂ ਅਤੇ ਉਹਨਾਂ ਦੇ ਮਾਪਿਆਂ ਨੇ ਆਪਣੀ ਖੁਸ਼ੀ ਜ਼ਾਹਰ ਕਰਦਿਆਂ ਆਯੋਜਕਾਂ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਇਹ ਉਨ੍ਹਾਂ ਦੀ ਸਿੱਖਿਆ ਦੇ ਅਗਲੇਰੀ ਯਾਤਰਾ ਨੂੰ ਆਸਾਨ ਬਣਾਵੇਗਾ। ਸਕੂਲ ਅਧਿਆਪਕਾਂ ਜਸਵੀਰ ਕੌਰ, ਦੀਪਕ ਕੁਮਾਰ, ਰਜਨੀ ਅਤੇ ਸ਼ਿਵਾਨੀ ਨੇ ਸਕੂਲ ਪ੍ਰਿੰਸੀਪਲ ਜਸਬੀਰ ਕੌਰ ਵੱਲੋਂ ਵਿਮਲ ਜੈਨ ਪ੍ਰਧਾਨ ਰੋਟਰੀ ਕਲੱਬ ਰਾਜਪੁਰਾ ਪ੍ਰਾਇਮ ਅਤੇ ਜੈਨ ਪਰਿਵਾਰ ਦਾ ਉਚੇਚੇ ਤੌਰ ਧੰਨਵਾਦ ਕੀਤਾ।
ਇਸ ਪਵਿੱਤਰ ਦਿਨ ਦੇ ਮੌਕੇ ‘ਤੇ ਮਸ਼ਹੂਰ ਕੱਵਾਲ ਨਸੀਰ ਗੰਗੋ ਸਹਾਰਨਪੁਰ ਵਾਲਿਆਂ ਵੱਲੋਂ ਰੂਹਾਨੀ ਕੱਵਾਲੀਆਂ ਪੇਸ਼ ਕੀਤੀਆਂ ਗਈਆਂ, ਜਿਨ੍ਹਾਂ ਨੇ ਸੰਗਤਾਂ ਨੂੰ ਝੂਮਣ ਲਈ ਮਜਬੂਰ ਕਰ ਦਿੱਤਾ। ਕੱਵਾਲੀ ਦੌਰਾਨ ਪੀਰ ਬਾਬਾ ਜੀ ਦੀ ਮਹਿਮਾ ਬਿਆਨ ਕੀਤੀ ਗਈ, ਜਿਸ ਕਾਰਨ ਭਗਤਜਨਾਂ ਵਿੱਚ ਵਿਸ਼ੇਸ਼ ਉਤਸ਼ਾਹ ਅਤੇ ਸ਼ਰਧਾ ਦੇ ਭਾਵ ਜਾਗ ਪਏ।
ਪੀਰ ਬਾਬਾ ਮਾਸੂਮ ਅਲੀ ਸ਼ਾਹ ਜੀ ਦੇ ਜਨਮ ਦਿਵਸ ਦੀ ਖੁਸ਼ੀ ਨੂੰ ਚਰਮ ‘ਤੇ ਪਹੁੰਚਾਉਂਦੇ ਹੋਏ, ਭੰਡਾਰੇ ਦੀ ਵਿਵਸਥਾ ਕੀਤੀ ਗਈ। ਲੰਗਰ ਵਿੱਚ ਭਗਤਜਨਾਂ ਅਤੇ ਰਾਹਗੀਰਾਂ ਨੇ ਪ੍ਰਸਾਦ ਛਕਿਆ। ਸੇਵਾਦਾਰਾਂ ਵੱਲੋਂ ਭਗਤਾਂ ਦੀ ਸੇਵਾ ਕੀਤੀ ਗਈ, ਜਿਸ ਕਾਰਨ ਸਮੂਹ ਸੰਗਤਾਂ ਨੇ ਉਨ੍ਹਾਂ ਦੀ ਭਰੀ ਪ੍ਰਸ਼ੰਸਾ ਕੀਤੀ।
ਇਹ ਪੂਰਾ ਸਮਾਗਮ ਬਹੁਤ ਹੀ ਸ਼ਰਧਾ, ਉਤਸ਼ਾਹ ਅਤੇ ਸਮਾਜਿਕ ਸੇਵਾ ਦੇ ਉਦੇਸ਼ ਨਾਲ ਮਨਾਇਆ ਗਿਆ, ਜਿਸ ਨੇ ਸਮਾਜ ਵਿੱਚ ਇੱਕ ਚੰਗਾ ਸੁਨੇਹਾ ਭੇਜਿਆ।
