ਬਿਨਾਂ ਸਰਜਰੀ ਦੇ ਬੁਜ਼ੁਰਗ ਮਰੀਜਾਂ ਦੇ ਦਿਲ ਦੇ ਏਓਰਟਿਕ ਵਾਲਵ ਬਦਲਣਾ ਆਸਾਨ : ਡਾ. ਬਾਲੀ
ਡਾ. ਬਾਲੀ ਨੇ 50 ਬੁਜੁਰਗ ਮਰੀਜਾਂ ਦਾ ਕੀਤਾ ਸਫਲ ਇਲਾਜ਼ : ਡਾ. ਬਾਲੀ
ਬੋਲੇ ਪੰਜਾਬ ਬਿਉਰੋ ( ਹਰਦੇਵ ਚੌਹਾਨ) ਚੰਡੀਗੜ੍ਹ, 15 ਫਰਵਰੀ
ਮਨੁੱਖੀ ਦਿਲ ਵਿੱਚ ਚਾਰ ਵਾਲਵ ਹੁੰਦੇ ਹਨ, ਜੋ ਖੂਨ ਦੇ ਪ੍ਰਵਾਹ ਨੂੰ ਕੰਟਰੋਲ ਕਰਦੇ ਹਨ ਪਰ ਕਈ ਵਾਰ ਇਹ ਸਹੀ ਢੰਗ ਨਾਲ ਖੁੱਲ੍ਹਦੇ ਅਤੇ ਬੰਦ ਨਹੀਂ ਹੁੰਦੇ, ਜਿਸ ਕਾਰਨ ਦਿਲ ਸਰੀਰ ਦੇ ਅੰਗਾਂ ਨੂੰ ਲੋੜੀਂਦਾ ਖੂਨ ਨਹੀਂ ਪਹੁੰਚਾ ਪਾਉਂਦਾ, ਜੋ ਘਾਤਕ ਹੋ ਸਕਦਾ ਹੈ। ਇਸ ਗੰਭੀਰ ਬਿਮਾਰੀ ਨੂੰ ਏਓਰਟਿਕ ਸਟੈਨੋਸਿਸ ਕਿਹਾ ਜਾਂਦਾ ਹੈ। ਟੀ.ਏ.ਵੀ.ਆਰ. (ਟਰਾਂਸਕੈਥੀਟਰ ਏਓਰਟਿਕ ਵਾਲਵ ਰੀਪਲੇਸਮੈਂਟ) ਏਓਰਟਿਕ ਸਟੈਨੋਸਿਸ ਦੇ ਇਲਾਜ਼ ਲਈ ਸੁਰੱਖਿਅਤ ਵਿਕਲਪ ਹੈ, ਜੋ ਬਿਨਾਂ ਸਰਜਰੀ ਦੇ ਕੀਤੀ ਜਾਂਦੀ ਹੈ।
ਡਾ. ਐਚ. ਕੇ. ਬਾਲੀ ਨੇ ਕਿਹਾ ਕਿ ਟੀ.ਏ.ਵੀ.ਆਰ. ਬਜ਼ੁਰਗਾਂ ਵਿੱਚ ਏਓਰਟਿਕ ਵਾਲਵ ਬਦਲਣ ਦਾ ਇੱਕ ਸੁਰੱਖਿਅਤ ਵਿਕਲਪ ਹੈ। ਉਨਾਂ ਦੱਸਿਆ ਕਿ ਹਾਲ ਹੀ ਦੌਰਾਨ ਏਓਰਟਿਕ ਸਟੈਨੋਸਿਸ ਨਾਲ ਪੀੜਿਤ 87 ਸਾਲਾਂ ਮਰੀਜ਼ ਗੰਭੀਰ ਹਾਲਤ ਵਿਚ ਹਸਪਤਾਲ ਆਇਆ, ਜਿਸਦੇ ਬਚਣ ਦੀ ਉਮੀਦ ਬਹੁਤ ਘੱਟ ਸੀ। ਡਾ. ਬਾਲੀ ਵਲੋਂ ਉਨਾਂ ਦੇ ਦਿਲ ਦੇ ਏਓਰਟਿਕ ਵਾਲਵ ਬਦਲਣ ਦੇ ਲਈ ਬਿਨਾਂ ਸਰਜਰੀ ਤਕਨੀਕ ਟੀ.ਏ.ਵੀ.ਆਰ. ਰਾਹੀਂ ਉਸਦਾ ਇਲਾਜ਼ ਕੀਤਾ ਅਤੇ ਉਹ ਅੱਜ ਸਾਡੇ ਵਿਚ ਪੁਰੀ ਤਰਾਂ ਨਾਲ ਤੰਦਰੁਸਤ ਹਨ।
70 ਤੋਂ 85 ਸਾਲ ਦੀ ਉਮਰ ਦੇ ਦਿਲ ਦੇ ਰੋਗੀਆਂ, ਜਿਨ੍ਹਾਂ ਨੇ ਟੀ.ਏ.ਵੀ.ਆਰ. ਕਰਵਾਇਆ, ਦੀ ਮੌਜੂਦਗੀ ਵਿੱਚ ਇਸ ਗੈਰ-ਸਰਜੀਕਲ ਪ੍ਰਕਿਰਿਆ ਬਾਰੇ ਵਿਸਤ੍ਰਿਤ ਜਾਣਕਾਰੀ ਦਿੰਦੇ ਹੋਏ ਕਾਰਡੀਅਕ ਸਾਇੰਸਿਜ਼ ਲਿਵਾਸਾ ਗਰੁੱਪ ਆਫ ਹਸਪਤਾਲ ਦੇ ਚੇਅਰਮੈਨ ਡਾ. ਐਚ.ਕੇ. ਬਾਲੀ ਨੇ ਕਿਹਾ ਕਿ ਇਹ ਇੱਕ ਘੱਟੋ-ਘੱਟ ਹਮਲਾਵਰ ਪ੍ਰਕਿਰਿਆ ਹੈ, ਜਿਸ ਵਿੱਚ ਓਪਨ ਹਾਰਟ ਸਰਜਰੀ ਤੋਂ ਬਿਨਾਂ ਪੁਰਾਣੇ ਵਾਲਵ ਨੂੰ ਹਟਾਏ ਬਿਨਾਂ, ਰੋਗੀ ਵਾਲਵ ਦੇ ਅੰਦਰ ਇੱਕ ਨਵਾਂ ਵਾਲਵ ਰੱਖਿਆ ਜਾਂਦਾ ਹੈ।
ਟੀ.ਏ.ਵੀ.ਆਰ. ਇੱਕ ਸਫਲ ਇਲਾਜ ਪ੍ਰਕਿਰਿਆ ਵੀ ਹੈ ਕਿਉਂਕਿ ਏਓਰਟਿਕ ਸਟੈਨੋਸਿਸ ਮੁੱਖ ਤੌਰ ‘ਤੇ ਬਜ਼ੁਰਗ ਮਰੀਜ਼ਾਂ ਵਿੱਚ ਪਾਇਆ ਜਾਂਦਾ ਹੈ ਅਤੇ ਉਹ ਅਕਸਰ ਗੁਰਦੇ, ਫੇਫੜੇ ਜਾਂ ਸ਼ੂਗਰ ਆਦਿ ਵਰਗੀਆਂ ਗੰਭੀਰ ਬਿਮਾਰੀਆਂ ਤੋਂ ਪੀੜਤ ਹੁੰਦੇ ਹਨ ਜਾਂ ਪਹਿਲਾਂ ਹੀ ਵਾਲਵ ਪਾ ਚੁੱਕੇ ਹੁੰਦੇ ਹਨ। ਇਸ ਲਈ, ਓਪਨ ਹਾਰਟ ਸਰਜਰੀ ਰਾਹੀਂ ਸਰਜੀਕਲ ਵਾਲਵ ਪਾਉਣਾ ਜੋਖਮ ਤੋਂ ਬਿਨਾਂ ਨਹੀਂ ਹੈ।
ਡਾ. ਬਾਲੀ, ਜਿਨ੍ਹਾਂ ਨੇ ਪਿਛਲੇ ਕੁਝ ਸਾਲਾਂ ਵਿੱਚ ਟੀ.ਏ.ਵੀ.ਆਰ. ਰਾਹੀਂ 50 ਤੋਂ ਵੱਧ ਬਜ਼ੁਰਗਾਂ ਦਾ ਇਲਾਜ ਕੀਤਾ ਹੈ, ਨੇ ਕਿਹਾ ਕਿ ਭਾਰਤ ਵਿੱਚ, ਖਾਸ ਤੌਰ ‘ਤੇ ਬਜ਼ੁਰਗ ਲੋਕਾਂ ਵਿੱਚ ਐਓਰਟਿਕ ਸਟੈਨੋਸਿਸ ਲਗਾਤਾਰ ਵੱਧ ਰਿਹਾ ਹੈ। ਇਹ 80 ਸਾਲ ਤੋਂ ਵੱਧ ਉਮਰ ਦੇ ਦੋ ਪ੍ਰਤੀਸ਼ਤ ਅਤੇ 90 ਸਾਲ ਤੋਂ ਵੱਧ ਉਮਰ ਦੇ ਚਾਰ ਪ੍ਰਤੀਸ਼ਤ ਲੋਕਾਂ ਵਿੱਚ ਪਾਇਆ ਜਾਂਦਾ ਹੈ।
