ਭਾਜਪਾ ਦਿੱਲੀ ਚ 70 ਚੋ 48 ਸੀਟਾਂ ਹਾਸਲ ਕਰਕੇ 27 ਵਰ੍ਹਿਆਂ ਪਿੱਛੋਂ ਦਿੱਲੀ ਵਾਲਿਆਂ ਦਾ ਦਿਲ ਜਿੱਤਣ ਚ ਕਾਮਯਾਬ ਰਹੀ ਹੈ।ਜਿਸ ਨਾਲ ਭਾਜਪਾ ਦੇ ਹੌਂਸਲੇ ਪੂਰੀ ਤਰਾਂ ਬੁਲੰਦ ਨਜ਼ਰ ਆ ਰਹੇ ਹਨ।ਉਸ ਨੂੰ ਲੱਗਦਾ ਹੈ ਜਿਵੇਂ ਦਿੱਲੀ ਚ ਆਮ ਆਦਮੀ ਪਾਰਟੀ ਨੂੰ ਧੋਬੀ ਪਟਕਾ ਮਾਰਿਆ ਹੈ ਠੀਕ ਇਸੇ ਤਰਾਂ ਪੰਜਾਬ ਚ ਵੀ ਆਮ ਆਦਮੀ ਪਾਰਟੀ ਨੂੰ ਸਿਆਸੀ ਧੋਬੀ ਪਟਕਣੀ ਦਿੱਤੀ ਜਾ ਸਕਦੀ ਹੈ।ਕੇਂਦਰੀ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਦੇ ਤਾਜ਼ਾ ਬਿਆਨ ਕੇ ਭਾਜਪਾ 2027 ਚ ਪੰਜਾਬ ਅੰਦਰ ਇਕੱਲਿਆਂ ਚੋਣ ਲੜੇਗੀ ।ਇਸ ਗੱਲ ਵੱਲ ਸਾਫ਼ ਇਸ਼ਾਰਾ ਕਰਦੇ ਨਜ਼ਰ ਆ ਰਹੇ ਹਨ ਕੇ ਭਾਜਪਾ ਦਾ ਅਗਲਾ ਨਿਸ਼ਾਨਾ ਹੁਣ ਪੰਜਾਬ ਦੀ ਸਤ੍ਹਾ ਉੱਤੇ ਕਾਬਜ ਹੋਣਾ ਹੈ। ਇਹ ਵੀ ਹੋ ਸਕਦਾ ਹੈ ਕੇ ਭਾਜਪਾ ਪੰਜਾਬ ਚ ਮਹਾਰਾਸ਼ਟਰ ਵਾਂਗ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਹੀ ਸਤ੍ਹਾਧਾਰੀ ਆਮ ਆਦਮੀ ਪਾਰਟੀ ਦੀ ਸੂਬਾ ਸਰਕਾਰ ਚ ਨਵਾ ਧੜਾ ਬਣਵਾ ਕੇ ਉਸ ਨੂੰ ਹਮਾਇਤ ਦੇ ਦੇਵੇ।।ਦੱਸਣਯੋਗ ਹੈ ਕੇ 2007 -2012 ਚ ਭਾਜਪਾ ਅਕਾਲੀ ਦਲ ਨਾਲ ਸਰਹੱਦੀ ਸੂਬੇ ਪੰਜਾਬ ਚ ਸਾਂਝੀ ਸਰਕਾਰ ਬਣਾ ਕੇ ਸਤ੍ਹਾ ਦਾ ਝੂਟਾ ਲੈ ਚੁੱਕੀ ਹੈ।ਪਰ ਹੁਣ ਉਹ ਇਕੱਲਿਆਂ ਸਰਕਾਰ ਬਣਾਉਣ ਦੀ ਤਮੰਨਾ ਰੱਖ ਰਹੀ ਹੈ। ਕਿਉਂਕਿ ਉਸਦੀ ਪੁਰਾਣੀ ਭਾਈਵਾਲ ਪਾਰਟੀ ਅਕਾਲੀ ਦਲ ਪੰਜਾਬ ਦੀ ਸਿਆਸਤ ਚ ਹਾਸ਼ੀਏ ਉੱਤੇ ਜਾ ਚੁੱਕੀ ਹੈ।ਸਿਆਸਤ ਚ ਕੋਈ ਵੀ ਡੁੱਬਦੀ ਬੇੜੀ ਚ ਸਵਾਰ ਨਹੀਂ ਹੋਣਾ ਚਾਹੁੰਦਾ।ਇਸ ਲਈ ਹੁਣ ਭਾਜਪਾ ਇਕੱਲਿਆਂ ਆਪਣੇ ਪਰ ਤੋਲਣ ਦੇ ਚੱਕਰ ਚ ਹੈ।ਭਾਂਵੇ ਕੇ 2027 ਚ ਅਜੇ ਦੋ ਵਰ੍ਹੇ ਪਏ ਹਨ ਤੇ ਸਿਆਸਤ ਚ ਕਿਸ ਵਕਤ ਕੀ ਹੋ ਜਾਵੇ ? ਕੁੱਝ ਪਤਾ ਨਹੀਂ ਹੁੰਦਾ? ਕਿਉਂਕਿ ਸਿਆਸਤ ਵਰਤਮਾਨ ਦੀ ਹੁੰਦੀ ਹੈ।ਫੇਰ ਵੀ ਭਾਜਪਾ ਹਾਈ ਕਮਾਂਡ ਇਸ ਵਾਰ ਪੰਜਾਬ ਚ ਇਕੱਲਿਆਂ ਚੋਣ ਲੜਨ ਦੇ ਮੂਡ ਚ ਹੈ।ਪਰ ਸਿਆਸੀ ਮਾਹਰਾਂ ਦਾ ਮੰਨਣਾ ਹੈ ਕੇ ਅੱਜ ਦੇ ਹਾਲਾਤਾਂ ਮੁਤਾਬਕ ਭਾਜਪਾ ਲਈ 2027 ਚ ਪੰਜਾਬ ਫ਼ਤਿਹ ਕਰਨਾ ਫਿਲਹਾਲ ਦਿੱਲੀ ਦੂਰ ਵਾਲੀ ਗੱਲ ਜਾਪਦੀ ਹੈ।ਕਿਉਂਕਿ ਪੰਜਾਬ ਦੀ ਭੂਗੋਲਕ ਸਥਿਤੀ ਤੇ ਇਥੋਂ ਦੇ ਲੋਕਾ ਦਾ ਸੁਭਾਅ ਦਿੱਲੀ ਤੇ ਦਿੱਲੀ ਦੇ ਲੋਕਾਂ ਤੋਂ ਵੱਖਰਾ ਹੈ।ਪੰਜਾਬੀ ਇਮੋਸ਼ਨਲ ਹਨ।ਇਹ ਕਿਸੇ ਦੀ ਟੈਂ (ਈਨ)ਨਹੀਂ ਮੰਨਦੇ।ਇਹ ਸਿਰਫ ਤੇ ਸਿਰਫ ਅਪਣੱਤ ਨਾਲ ਜਿੱਤੇ ਜਾ ਸਕਦੇ ਹਨ।ਇਹ ਧੱਕਾ ਬਿਲਕੁਲ ਸਹਿਣ ਨਹੀਂ ਕਰਦੇ। ਹਾਂ ਪਿਆਰ ਨਾਲ ਬੇਸ਼ੱਕ ਏਨਾ ਤੋਂ ਜੋ ਮਰਜ਼ੀ ਮਨਵਾ ਲਵੋ।ਅਗਲੀ ਗੱਲ ਦਿੱਲੀ ਚ ਆਮ ਆਦਮੀ ਪਾਰਟੀ ਪਿਛਲੇ ਲੰਬੇ ਸਮੇਂ ਤੋਂ ਸਤ੍ਹਾ ਉੱਤੇ ਕਾਬਜ਼ ਸੀ।ਜਿਸ ਕਰਕੇ ਲੋਕਾਂ ਚ ਸਤਾਹ੍ਹਧਾਰੀ ਪਾਰਟੀ ਖਿਲਾਫ ਨਰਾਜ਼ਗੀ ਪੈਦਾ ਹੋਣੀ ਸੁਭਾਵਕ ਸੀ।ਅਗਲੀ ਗੱਲ ਅਰਵਿੰਦ ਕੇਜਰੀਵਾਲ ਵੱਲੋਂ ਲਿਆਂਦੀ ਗਈ ਨਵੀਂ ਸ਼ਰਾਬ ਨੀਤੀ ਨੇ ਵੀ ਉਸਦਾ ਭੱਠਾ ਬੈਠਾਉਣ ਚ ਕਾਫੀ ਭੂਮਿਕਾ ਨਿਭਾਈ ਹੈ।ਮੁੱਖ ਮੰਤਰੀ ,ਉਪ ਮੁੱਖ ਮੰਤਰੀ ,ਮੰਤਰੀਆਂ ਤੇ ਵਿਧਾਇਕਾਂ ਦਾ ਵੱਖ ਵੱਖ ਮਾਮਲਿਆਂ ਚ ਫਸਣਾ ਆਮ ਆਦਮੀ ਪਾਰਟੀ ਲਈ ਘਾਤਕ ਸਾਬਤ ਹੋਇਆ।ਇਸ ਤੋਂ ਅੱਗੇ ਦਿੱਲੀ ਸਰਕਾਰ ਦਾ ਏਜੀ ਨਾਲ ਨਿੱਤ ਦਿਹਾੜੇ ਦਾ ਕਾਟੋ ਕਲੇਸ਼ ਵੀ ਸਤਾਹ੍ਹਧਾਰੀ ਆਮ ਆਦਮੀ ਪਾਰਟੀ ਨੂੰ ਲੈ ਬੈਠਾ।ਕਿਉਂਕਿ ਇਸ ਨਾਲ ਸਰਕਾਰ ਸਹੀ ਕੰਮ ਕਰਨ ਚ ਅਸਮਰਥ ਰਹੀ। ਕੇਂਦਰ ਚ ਭਾਜਪਾ ਦੇ ਸਤ੍ਹਾ ਚ ਹੋਣ ਦਾ ਲਾਭ ਵੀ ਭਾਜਪਾ ਨੂੰ ਮਿਲਿਆ।ਜਦ ਕੇ ਪੰਜਾਬ ਚ ਆਮ ਆਦਮੀ ਪਾਰਟੀ ਅਜੇ ਇਨਾਂ ਗੱਲਾਂ ਤੋਂ ਬਚੀ ਹੋਈ ਨਜ਼ਰ ਆਉਂਦੀ ਹੈ।ਭਾਂਵੇ ਕੇ ਤਿੰਨ ਸਾਲਾਂ ਦੇ ਕਾਰਜਕਾਲ ਦੌਰਾਨ ਸੂਬੇ ਦੇ ਲੋਕਾਂ ਚ ਨਰਾਜ਼ਗੀ ਛਲਕਦੀ ਜਰੂਰ ਵਿਖਾਈ ਦੇ ਰਹੀ ਹੈ ਤੇ ਪਾਰਟੀ ਚ ਅੰਦਰੂਨੀ ਧੜੇਬੰਦੀ ਵੀ ਹੈ।ਪਰ ਇਸ ਦੇ ਬਾਵਜੂਦ ਇਸ ਦਾ ਗ੍ਰਾਫ ਬਹੁਤ ਡਿੱਗਿਆ ਨਹੀਂ। ਜਿਸ ਕਰਕੇ ਭਾਜਪਾ ਨੂੰ ਪੰਜਾਬ ਚ ਆਪ ਤੇ ਕਾਂਗਰਸ ਨਾਲ ਤਿਕੋਨ ਮੁਕਾਬਲਾ ਕਰਨਾ ਪਵੇਗਾ।ਜਦ ਕੇ ਦਿੱਲੀ ਚ ਉਸਦੀ ਲੜਾਈ ਕੇਵਲ ਆਪ ਨਾਲ ਹੀ ਸੀ।ਕਿਉਂਕਿ ਉਥੇ ਕਾਂਗਰਸ ਕਾਫੀ ਕਮਜ਼ੋਰ ਸੀ।ਪਰ ਪੰਜਾਬ ਚ ਸਿਆਸੀ ਹਾਲਾਤ ਵੱਖਰੇ ਹਨ।ਪੰਜਾਬ ਚ ਕਾਂਗਰਸ ਇੱਕ ਮਜ਼ਬੂਤ ਸਥਿਤੀ ਚ ਹੈ।ਦਿੱਲੀ ਇੱਕ ਅਰਧ ਸਰਕਾਰੀ ਰਾਜ ਹੈ ।ਜਦ ਕੇ ਪੰਜਾਬ ਪੂਰਨ ਰਾਜ ਹੈ। ਜਿੱਥੇ ਪ੍ਰਸ਼ਾਸਨ ਸੂਬਾ ਸਰਕਾਰ ਦੇ ਅਧੀਨ ਚਲਦਾ ਹੈ ।ਜਦ ਕੇ ਦਿੱਲੀ ਚ ਅਜਿਹਾ ਨਹੀਂ ਹੁੰਦਾ ਤੇ ਪੁਲਿਸ ਪ੍ਰਸ਼ਾਸਨ ਕੇਂਦਰ ਸਰਕਾਰ ਅਧੀਨ ਹੈ। ਤੇ ਪ੍ਰਸ਼ਾਸਨ ਚੋਣਾਂ ਦੌਰਾਨ ਵੱਡੀ ਭੂਮਿਕਾ ਨਿਭਾਉਂਦਾ ਹੈ।ਇਸ ਤੋਂ ਅਗਲੀ ਗੱਲ ਪੰਜਾਬ ਇਕ ਖੇਤੀ ਪ੍ਰਧਾਨ ਸੂਬਾ ਹੋਣ ਕਰਕੇ ਕਾਫੀ ਸੰਖਿਆ ਚ ਵੋਟਰ ਖੇਤੀਬਾੜੀ ਦੇ ਧੰਦੇ ਨਾਲ ਜੁੜੇ ਹੋਏ ਹਨ।ਕਿਸਾਨ ਪਿਛਲੇ ਲੰਬੇ ਸਮੇਂ ਤੋ ਭਾਜਪਾ ਨਾਲ ਨਾਰਾਜ਼ ਚੱਲਦੇ ਆ ਰਹੇ ਹਨ ਤੇ ਉਨ੍ਹਾਂ ਵੱਲੋਂ ਕਿਸਾਨੀ ਮੰਗਾਂ ਨੂੰ ਲੈ ਕੇ ਅੰਦੋਲਨ ਵੀ ਵਿੱਢਿਆ ਹੋਇਆ ਹੈ।ਜੋ ਭਾਜਪਾ ਲਈ ਸਭ ਤੋ ਵੱਡੀ ਸਿਰਦਰਦੀ ਹੈ।ਜਿਸ ਨੂੰ ਹੱਲ ਕੀਤੇ ਬਿਨਾ ਭਾਜਪਾ ਲਈ ਪੰਜਾਬ ਫ਼ਤਿਹ ਦਾ ਸੁਪਨਾ ਸ਼ਾਇਦ ਦਿਨ ਨੂੰ ਸੁਪਨਾ ਵੇਖਣ ਵਾਂਗ ਹੈ।ਇੱਥੇ ਹੀ ਬਸ ਨਹੀਂ ਪੰਜਾਬ ਚ 32ਪ੍ਰਤੀਸ਼ਤ ਤੋਂ ਵਧੇਰੇ ਦਲਿੱਤ ਵੋਟਰ ਹਨ।ਜਿਨਾਂ ਨੂੰ ਭਾਜਪਾ ਆਪਣੇ ਵੱਲ ਖਿੱਚਣ ਲਈ ਕੀ ਪੈਂਤੜਾ ਅਪਨਾਉਂਦੀ ਹੈ ਇਹ ਵੀ ਵੇਖਣਾ ਹੋਵੇਗਾ।ਕਿਉਂਕਿ ਇਸ ਵਕਤ ਜਿਆਦਾਤਰ ਦਲਿਤ ਵੋਟਰ ਆਪ ਤੇ ਕਾਂਗਰਸ ਨਾਲ ਜੁੜਿਆ ਹੋਇਆ ਹੈ।ਆਉਣ ਵਾਲੇ ਸਮੇਂ ਚ ਦਿੱਲੀ ਚ ਭਾਜਪਾ ਆਪਣੇ ਵਾਅਦਿਆਂ ਨੂੰ ਕਿੰਨਾ ਕੁ ਪੂਰਿਆਂ ਕਰਦੀ ਹੈ ? ਇਸ ਦਾ ਅਸਰ ਵੀ ਭਾਜਪਾ ਦੇ ਪੰਜਾਬ ਫ਼ਤਿਹ ਕਰਨ ਦੇ ਸੁਪਨੇ ਉੱਤੇ ਜਰੂਰ ਪਵੇਗਾ।ਉਧਰ ਪੰਜਾਬ ਸਰਕਾਰ ਆਉਣ ਵਾਲੇ 2 ਸਾਲਾਂ ਚ ਕਿੰਨੇ ਵਾਅਦੇ ਪੂਰੇ ਕਰਦੀ ਹੈ ? ਇਹ ਵੀ ਵੇਖਣ ਵਾਲੀ ਗੱਲ ਹੋਵੇਗੀ ਹੈ।ਇਨਾਂ ਪ੍ਰਸਥਿਤੀਆਂ ਦਾ ਸਾਹਮਣਾ ਕਰਨ ਦੇ ਨਾਲ ਨਾਲ ਭਾਜਪਾ ਨੇਤਾਵਾਂ ਨੂੰ ਪੰਜਾਬ ਦੇ ਲੋਕਾਂ ਪ੍ਰਤੀ ਅਪਣੱਤ ਵਿਖਾਉਣੀ ਪਵੇਗੀ।।ਜਿਸ ਨਾਲ ਪੰਜਾਬ ਦੇ ਲੋਕਾਂ ਨੂੰ ਜਾਪੇ ਕੇ ਭਾਜਪਾ ਉਹਨਾਂ ਦੀ ਹਿੱਤੂ ਪਾਰਟੀ ਹੈ।ਨਾਲ ਹੀ ਭਾਜਪਾ ਨੂੰ ਕੰਗਨਾ ਰਣੌਤ ਵਰਗੇ ਸਿਰ ਫਿਰੇ ਭਾਜਪਾ ਨੇਤਾਵਾਂ ਦੀ ਬਿਆਨਬਾਜੀ ਉੱਤੇ ਵੀ ਰੋਕ ਲਾਉਣੀ ਪਵੇਗੀ।ਜੋ ਪੰਜਾਬ ਪ੍ਰਤੀ ਜਹਿਰ ਉਗਲਣ ਵਾਲੇ ਬਿਆਨ ਦਿੰਦੇ ਹਨ।ਜੋ ਨਫ਼ਰਤ ਫੈਲਾਉਂਦੇ ਹਨ,ਕੁੜੱਤਣ ਪੈਦਾ ਕਰਦੇ ਹਨ ਤੇ ਦੂਰੀਆਂ ਵਧਾਉਦੇ ਹਨ।ਇਹੋ ਜੇਹੇ ਬੇਤੁਕੇ ਬਿਆਨ ਪੰਜਾਬੀਆਂ ਨੂੰ ਭਾਜਪਾ ਪ੍ਰਤੀ ਬੇਗਾਨਗੀ ਵਾਲਾ ਅਹਿਸਾਸ ਕਰਵਾਉਂਦੇ ਨੇ।ਭਾਜਪਾ ਨੂੰ ਪੰਜਾਬ ਫ਼ਤਿਹ ਕਰਨ ਵਾਸਤੇ ਆਪਣੇ ਸਪੈਸ਼ਲ ਆਈਟੀ ਸੈੱਲ ਨੂੰ ਵੀ ਮਜ਼ਬੂਤ ਕਰਨਾ ਪਵੇਗਾ।ਜੋ ਭਾਜਪਾ ਦੀ ਪੰਜਾਬ ਪ੍ਰਤੀ ਹਾਂ ਪੱਖੀ ਸੋਚ ਨੂੰ ਉਭਾਰੇ ਤਾਂ ਕੇ ਪੰਜਾਬੀਆਂ ਦੇ ਮਨਾਂ ਚ ਜੋ ਭਾਜਪਾ ਵਿਰੋਧੀ ਸੋਚ ਹੈ ਉਸ ਨੂੰ ਬਦਲਿਆ ਜਾ ਸਕੇ।ਭਾਜਪਾ ਦੀ ਕੇਂਦਰੀ ਲੀਡਰਸ਼ਿਪ ਨੂੰ ਪੰਜਾਬ ਪ੍ਰਤੀ ਹਾਂ ਪੱਖੀ ਸੋਚ ਨੂੰ ਉਭਾਰਨ ਵਾਸਤੇ ਪੰਜਾਬ ਪੱਖੀ ਫ਼ੈਸਲੇ ਲੈਣੇ ਪੈਣਗੇ। ਜਿਵੇਂ ਮੋਦੀ ਸਰਕਾਰ ਵੱਲੋਂ ਪਹਿਲਾਂ ਦਸਵੇ ਪਾਤਸ਼ਾਹ ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੇ ਦੇ ਛੋਟੇ ਸਾਹਿਬਜ਼ਾਦਿਆਂ ਬਾਬਾ ਜੋਰਾਵਰ ਸਿੰਘ ਤੇ ਫ਼ਤਿਹ ਸਿੰਘ ਜੀ ਦੀ ਸ਼ਹਾਦਤ ਨੂੰ ਮਹੱਤਵ ਦਿੰਦੇ ਹੋਏ ਹਰ ਵਰ੍ਹੇ 26 ਦਸੰਬਰ ਨੂੰ ਪੂਰੇ ਭਾਰਤ ਚ ‘ ਵੀਰ ਬਾਲ ਦਿਵਸ ‘ ਦੇ ਰੂਪ ਚ ਮਨਾਉਣ ਦਾ ਫ਼ੈਸਲਾ ਲਿਆ ਗਿਆ ਸੀ। ਉਸ ਮਗਰੋਂ ਸ੍ਰੀ ਕਰਤਾਰਪੁਰ ਸਾਹਿਬ ਦਾ ਲਾਂਘਾ ਖੁਲ੍ਹਵਾ ਕੇ ਇਤਿਹਾਸ ਸਿਰਜਿਆ
ਹੈ।ਭਾਜਪਾ ਨੂੰ ਅਜਿਹੇ ਫੈਸਲਿਆਂ ਨੂੰ ਲੋਕਾਂ ਚ ਪ੍ਰਚਾਰਨਾ ਬਣਦਾ ਹੈ। ਉਸ ਨੂੰ ਪੰਜਾਬ ਪੱਖੀ ਲਏ ਜਾਣ ਵਾਲੇ ਹਰ ਨਿੱਕੇ ਤੋਂ ਨਿੱਕੇ ਨਿਰਣੇ ਨੂੰ ਮਾਸ ਲੈਵਲ ਤੱਕ ਵਿਚ ਲੈ ਕੇ ਜਾਣ ਦੀ ਲੋੜ ਹੈ।ਕਿਉਂਕਿ ਪੰਜਾਬ ਦੇ ਲੋਕਾਂ ਚ ਬੀਜੇਪੀ ਪ੍ਰਤੀ ਜੋ ਨੈਗਟਿਵ (ਨਾਂਹ ਪੱਖੀ )ਸੋਚ ਬਣੀ ਹੋਈ ਹੈ ਉਸ ਨੂੰ ਹਾਂ ਪੱਖੀ ਬਣਾਉਣਾ ਬੇਹੱਦ ਲਾਜ਼ਮੀ ਹੈ।ਪੰਜਾਬ ਦੇ ਲੋਕਾਂ ਦੀ ਸੋਚ ਨੂੰ ਬਦਲਣ ਵਾਸਤੇ ਭਾਜਪਾ ਨੂੰ ਭਵਿੱਖ ਚ ਹੋਰ ਤਕੜੇ ਫ਼ੈਸਲੇ ਲੈਣੇ ਪੈਣਗੇ।ਜਿੱਦਾਂ ਪੰਜਾਬ ਦੇ ਨੌਜਵਾਨ ਦਾ ਮਿਲਟਰੀ ਚ ਭਰਤੀ ਦਾ ਕੋਟਾ ਵਧਾਉਣਾ ਪਵੇਗਾ।ਪੰਜਾਬ ਸਿਰ ਅੱਤਵਾਦ ਵੇਲੇ ਚੜਿਆ ਕਰਜ਼ਾ ਮੁਆਫ਼ ਕਰਨਾ ਪਵੇਗਾ।ਕੋਈ ਵੱਡੀ ਆਰਥਕ ਰਾਹਤ ਦੇ ਕੇ ਪੰਜਾਬੀਆਂ ਦਾ ਦਿਲ ਜਿੱਤਿਆ ਜਾ ਸਕਦਾ ਹੈ।ਸੂਬੇ ਨੂੰ ਵਿਸ਼ੇਸ਼ ਰਾਜ ਦਾ ਦਰਜ਼ਾ ਦਿੱਤਾ ਜਾ ਸਕਦਾ ਹੈ।ਜਾਂ ਕੋਈ ਹੋਰ ਆਰਥਕ ਪੈਕਜ ਦਿੱਤਾ ਜਾ ਸਕਦਾ ਹੈ। ਕੋਈ ਅਜਿਹੀ ਵੱਡੀ ਇੰਡਸਟਰੀ ਪੰਜਾਬ ਚ ਸਥਾਪਤ ਕੀਤੀ ਜਾ ਸਕਦੀ ਹੈ।ਜਿਸ ਨਾਲ ਇਥੋਂ ਦੇ ਨੌਜਵਾਨਾ ਨੂੰ ਵੱਡੀ ਗਿਣਤੀ ਚ ਰੁਜ਼ਗਾਰ ਮਿਲ ਸਕੇ।ਜੇ ਭਾਜਪਾ ਨੇ ਸੱਚ ਮੁੱਚ ਇਕੱਲਿਆਂ ਪੰਜਾਬ ਦੇ ਰਣ ਖੇਤਰ ਚ ਉਤਰਣਾ ਹੈ ਤਾਂ ਉਸ ਨੂੰ 12 ਹਜ਼ਾਰ ਤੋ ਉਪਰ ਪਿੰਡਾਂ ਚ ਜਾ ਕੇ ਲੋਕਾਂ ਨਾਲ ਅਪਣੱਤ ਵਿਖਾਉਣੀ ਪਵੇਗੀ।ਹਿੰਡ ਛੱਡ ਕੇ ਕਿਸਾਨਾਂ ਦੇ ਮਸਲੇ ਨੂੰ ਹੱਲ ਕਰਨਾ ਪਵੇਗਾ।ਉਨਾਂ ਨੂੰ ਗਲੇ ਲਾਉਣਾ ਪਵੇਗਾ।ਉਨਾਂ ਦੇ ਦੁੱਖ ਸੁੱਖ ਚ ਸ਼ਰੀਕ ਹੋਣਾ ਪਵੇਗਾ। ਉਨਾਂ ਦੀ ਬਾਂਹ ਫੜਨੀ ਪਵੇਗੀ। ਉਨਾਂ ਦੀ ਗੱਲ ਸੁਣਨੀ ਪਵੇਗੀ। ਤਾਂ ਜੋ ਉਨਾਂ ਨੂੰ ਮਹਿਸੂਸ ਹੋਵੇ ਕੇ ਭਾਜਪਾ ਆਗੂ ਬੇਗਾਨੇ ਨਹੀਂ ਸਗੋਂ ਉਨਾਂ ਦੇ ਆਪਣੇ ਹਨ। ਪੰਜਾਬ ਭਾਜਪਾ ਦੀ ਸੀਨੀਅਰ ਲੀਡਰਸ਼ਿਪ ਪਾਰਟੀ ਹਾਈ ਕਮਾਂਡ ਨੂੰ ਇਹ ਸਾਰੀਆਂ ਗੱਲਾਂ ਸਮਝਾ ਕੇ ਜਿੱਤ ਵਾਸਤੇ ਰਾਹ ਪੱਧਰਾ ਕਰ ਸਕਦੀ ਹੈ।ਸੋ ਭਵਿੱਖ ਚ ਭਾਜਪਾ ਨੂੰ ਅਜਿਹੇ ਮਜ਼ਬੂਤ ਫੈਸਲਾਕੁੰਨ ਨਿਰਣੇ ਲੈਣ ਦੀ ਲੋੜ ਹੈ।ਜੋ ਭਾਜਪਾ ਨੂੰ ਪੰਜਾਬ ਚ ਮਜ਼ਬੂਤੀ ਦੇਣ।ਬੇਸ਼ੱਕ ਭਾਜਪਾ ਪੰਜਾਬ ਚ 2024 ਦੀਆਂ ਲੋਕ ਸਭਾ ਚੋਣਾਂ ਇਕੱਲਿਆਂ ਲੜੀ ਤੇ ਵੋਟ ਪ੍ਰਤੀਸ਼ਤ ਚ ਵਾਧਾ ਹੋਇਆ ਤਾਂ ਵੀ ਉਕਤ ਫ਼ੈਸਲੇ ਲਏ ਬਿਨਾ 2027 ਚ ਭਾਜਪਾ ਲਈ ਪੰਜਾਬ ਫ਼ਤਿਹ ਕਰਨਾ ਏਨਾ ਸੌਖਾ ਨਹੀਂ ਬਲ ਕੇ ਪੈਂਡਾ ਔਖਾ ਜਾਪਦਾ ਹੈ। ਇਸ ਤੋਂ ਇਲਾਵਾ ਬਿਨਾਂ ਮਲਾਹ ਤੋਂ ਚੱਲ ਰਹੀ ਪੰਜਾਬ ਭਾਜਪਾ ਦੀ ਬੇੜੀ ਨੂੰ ਨਵੇਂ ਤੇ ਮਜ਼ਬੂਤ ਮਲਾਹ ਦੀ ਵੀ ਲੋੜ ਹੈ।ਜੋ ਜੱਟ ਸਿੱਖ ਹੋਵੇ ਤਾਂ ਬੇਹਤਰ ਹੈ । ਮੁੱਖ ਮਲਾਹ ਨਾਲ ਇਕ ਦਲਿਤ ਤੇ ਦੂਜਾ ਹਿੰਦੂ ਚਿਹਰੇ ਵਾਲਾ ਮਲਾਹ ਭਾਜਪਾ ਦੀ ਬੇੜੀ ਨੂੰ ਪਾਰ ਲਾਉਣ ਚ ਮੱਦਤਗਾਰ ਬਣ ਸਕਦੇ ਹਨ।ਇਸ ਦੇ ਬਾਵਜੂਦ ਇਹ ਤਾਂ ਸਮਾਂ ਹੀ ਦੱਸੇਗਾ ਕੇ ਭਾਜਪਾ ਦਾ ਪੰਜਾਬ ਫਤਿਹੇ ਦਾ ਸੁਪਨਾ ਪੂਰਾ ਹੁੰਦਾ ਹੈ ਜਾਂ ਫਿਰ ਅਧੂਰਾ ਰਹਿੰਦਾ ਹੈ।
ਲੈਕਚਰਾਰ ਅਜੀਤ ਖੰਨਾ
ਮੋਬਾਈਲ :76967-54669
