ਚੰਡੀਗੜ੍ਹ, 1 ਫਰਵਰੀ,ਬੋਲੇ ਪੰਜਾਬ ਬਿਊਰੋ :
ਭੁਲੱਥ ਤੋਂ ਕਾਂਗਰਸ ਦੇ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਦੀ ਅਗਵਾਈ ਹੇਠ ਵਫ਼ਦ ਨੇ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨਾਲ ਮੁਲਾਕਾਤ ਕਰਕੇ ਸੂਬੇ ਦੇ ਸਿਵਲ ਤੇ ਪੁਲਿਸ ਅਧਿਕਾਰੀਆਂ ’ਤੇ ਕਾਂਗਰਸੀ ਕੌਸਲਰਾਂ ਨੂੰ ਡਰਾਉਣ ਦਾ ਦੋਸ਼ ਲਾਇਆ ਹੈ।
ਰਾਜਪਾਲ ਨੂੰ ਦਿੱਤੇ ਮੰਗ ਪੱਤਰ ਵਿਚ ਖਹਿਰਾ ਨੇ ਕਿਹਾ ਕਿ 3 ਫਰਵਰੀ ਨੂੰ ਐਨਏਸੀ ਨਡਾਲਾ ਦੇ ਪ੍ਰਧਾਨ ਦੀ ਚੋਣ ਹੋਣੀ ਹੈ। ਕਾਂਗਰਸੀ ਕੌਂਸਲਰਾਂ ਨੂੰ ਕਪੂਰਥਲਾ ਦੇ ਸਿਵਲ ਅਤੇ ਪੁਲਿਸ ਪ੍ਰਸ਼ਾਸਨ ਵੱਲੋਂ ਲਗਾਤਾਰ ਤੰਗ ਪਰੇਸ਼ਾਨ ਕਰਕੇ ਸੱਤਾਧਾਰੀ ਪਾਰਟੀ ਦੇ ਉਮੀਦਵਾਰਾਂ ਨੂੰ ਵੋਟ ਪਾਉਣ ਲਈ ਧਮਕਾਇਆ ਜਾ ਰਿਹਾ ਹੈ। ਖਹਿਰਾ ਨੇ ਕਿਹਾ ਕਿ ਇਕ ਆਰਕੀਟੈਕਟ ਅਤੇ ਕਾਰਜਸਾਧਕ ਅਫ਼ਸਰ ਨਡਾਲਾ ਰਣਦੀਪ ਸਿੰਘ ਵਲੋਂ ਲਗਾਤਾਰ ਧਮਕਾਇਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਦੀ ਕੌਸਲਰ ਮਨਜੀਤ ਕੌਰ ਨੂੰ ਇੱਕ ਗੈਰਕਾਨੂੰਨੀ ਨੋਟਿਸ ਭੇਜਕੇ ਵਿਲਾ ਰਿਜੋਰਟ ਨੂੰ ਸੀ.ਐਲ.ਯੂ ਨਿਯਮਾਂ ਦੀ ਉਲੰਘਣਾ ਕਰਨ ਕਰਕੇ 19 ਲੱਖ ਰੁਪਏ ਦਾ ਬਕਾਇਆ ਜਮਾਂ ਕਰਵਾਉਣ ਲਈ ਕਿਹਾ ਗਿਆ ਸੀ।
ਉਨ੍ਹਾਂ ਦੱਸਿਆ ਕਿ ਮਨਜੀਤ ਕੌਰ ਰਿਜੋਰਟ ਦੇ ਛੇ ਭਾਈਵਾਲਾਂ (ਹਿੱਸੇਦਾਰਾਂ) ਵਿੱਚੋਂ ਇੱਕ ਹੈ ਜੋ ਕਿ 11 ਸਾਲ ਪਹਿਲਾਂ ਬਣਾਇਆ ਗਿਆ ਸੀ ਅਤੇ ਉਨ੍ਹਾਂ ਨੇ ਪੁੱਡਾ ਐਕਟ ਦੀਆਂ ਸਾਰੀਆਂ ਸ਼ਰਤਾਂ ਪੂਰੀਆਂ ਕੀਤੀਆਂ ਸਨ। ਖਹਿਰਾ ਨੇ ਕਿਹਾ ਕਿ ਕਾਰਜ ਸਾਧਕ ਅਫਸਰ ਨਡਾਲਾ ਰਣਦੀਪ ਸਿੰਘ ਨੇ ਕੌਸਲਰ ਦੀ ਚੋਣ ਲੜਣ ਲਈ ਪਹਿਲਾ ਕੋਈ ਇਤਰਾਜ਼ ਨਹੀ (ਐਨੳਸੀ) ਦਿੱਤੀ ਸੀ। ਜੇਕਰ ਕੋਈ ਬਕਾਇਆ ਸੀ ਤਾਂ ਉਸਨੂੰ ਚੋਣ ਲੜਣ ਲਈ ਐਨਓਸੀ ਕਿਉਂ ਦਿੱਤੀ ਗਈ?
ਇਸੇ ਤਰਾਂ ਕੌਸਲਰ ਆਤਮਾ ਸਿੰਘ ਨੂੰ ਕਰੀਬ 25 ਸਾਲ ਪਹਿਲਾਂ 2000-2001 ਦੀ ਜਮਾਂਬੰਦੀ ਦਾ ਹਵਾਲਾ ਦਿੰਦਿਆਂ ਐਨ.ਏ.ਸੀ ਦੀ ਜਮੀਨ ’ਤੇ ਨਜਾਇਜ ਕਬਜਾ ਕੀਤੇ ਹੋਣ ਦਾ ਝੂਠਾ ਦੋਸ਼ ਲਗਾਉਂਦਿਆਂ ਨੋਟਿਸ ਜਾਰੀ ਕਰ ਦਿੱਤਾ। ਸੱਤਾਧਾਰੀ ਪਾਰਟੀ ਦੇ ਉਮੀਦਵਾਰਾਂ ਨੂੰ ਵੋਟ ਪਾਉਣ ਲਈ ਬਾਂਹ ਮਰੋੜਣ ਦੀ ਇੱਕ ਹੋਰ ਕੋਝੀ ਕੋਸ਼ਿਸ਼ ਹੈ।
ਉਨ੍ਹਾਂ ਰਾਜਪਾਲ ਤੋਂ ਨਡਾਲਾ ਦੇ ਪ੍ਰਧਾਨ ਦੀ ਚੋਣ ਲਈ ਕਿਸੇ ਸੇਵਾਮੁਕਤ ਨਿਆਂਇਕ ਅਧਿਕਾਰੀ ਨੂੰ ਸੁਤੰਤਰ ਆਬਜਰਵਰ ਵਜੋਂ ਨਿਯੁਕਤ ਕਰਨ ਦੀ ਮੰਗ ਕੀਤੀ।
