ਅੰਮ੍ਰਿਤਸਰ, 7 ਜਨਵਰੀ,ਬੋਲੇ ਪੰਜਾਬ ਬਿਊਰੋ ;
ਪਾਵਰਕਾਮ ਦੇ ਜੇ.ਈ. ਸਮੇਤ ਹੋਰ ਕਰਮਚਾਰੀਆਂ ਨਾਲ ਕੁਝ ਲੋਕਾਂ ਵੱਲੋਂ ਕੁੱਟਮਾਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਾਣਕਾਰੀ ਮੁਤਾਬਕ ਫੇਅਰਲੈਂਡ ਕਾਲੋਨੀ, ਫਤਿਹਗੜ੍ਹ ਚੂੜੀਆਂ ਰੋਡ ‘ਤੇ ਸਾਲ 2022 ਤੋਂ ਖਰਾਬ ਮੀਟਰ ਨੂੰ ਬਦਲਣ ਲਈ ਕੁਲਦੀਪ ਸ਼ਰਮਾ ਜੇ.ਈ. ਦੀ ਅਗਵਾਈ ਵਿੱਚ, ਏਰੀਆ ਵਾਈਜ਼ ਉਪਮੰਡਲ ਅਧਿਕਾਰੀ ਗੋਪਾਲ ਨਗਰ, ਮਜੀਠਾ ਰੋਡ ਦੁਆਰਾ ਲਗਾਈ ਡਿਊਟੀ ਮੁਤਾਬਕ, ਵਿਭਾਗ ਦੀਆਂ ਹਦਾਇਤਾਂ ਅਨੁਸਾਰ ਪਹੁੰਚੇ।
ਜਦੋਂ ਮੀਟਰ ਬਦਲਣਾ ਸ਼ੁਰੂ ਕੀਤਾ ਗਿਆ ਤਾਂ ਉਪਭੋਗਤਾ ਨੇ ਆਪਣੇ 2 ਪੁੱਤਰਾਂ ਅਤੇ ਇੱਕ ਹੋਰ ਰਿਸ਼ਤੇਦਾਰ ਨੂੰ ਬੁਲਾ ਕੇ ਪਹਿਲਾਂ ਲਾਈਨਮੈਨ ਕੁਲਵੰਤ ਸਿੰਘ ਨਾਲ ਕੁੱਟਮਾਰ ਕੀਤੀ। ਜਦੋਂ ਜੇ.ਈ. ਕੁਲਦੀਪ ਸ਼ਰਮਾ ਬਚਾਅ ਕਰਨ ਗਏ ਤਾਂ ਉਨ੍ਹਾਂ ਨਾਲ ਵੀ ਕੁੱਟਮਾਰ ਕੀਤੀ ਗਈ, ਜਿਸ ਨਾਲ ਉਨ੍ਹਾਂ ਦੀ ਨੱਕ ਦੀ ਹੱਡੀ ਟੁੱਟ ਗਈ।
ਇਸ ਸੰਬੰਧ ਵਿੱਚ ਚੌਕੀ ਫੈਜ਼ਪੁਰਾ ਵਿੱਚ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ। ਉਨ੍ਹਾਂ ਨੂੰ ਸਿਵਿਲ ਹਸਪਤਾਲ ਵਿੱਚ ਡਾਕਟਰੀ ਮੁਆਇਨੇ ਲਈ ਭੇਜਿਆ ਗਿਆ। ਜੇ.ਈ. ਕੁਲਦੀਪ ਸ਼ਰਮਾ ਨੇ ਦੱਸਿਆ ਕਿ ਉਪਭੋਗਤਾ ਆਪਣੇ ਆਪ ਨੂੰ ਪੁਲਿਸ ਕਰਮਚਾਰੀ ਦੱਸ ਰਿਹਾ ਸੀ। ਜਦੋਂ ਇਸ ਦੀ ਜਾਣਕਾਰੀ ਗੋਪਾਲ ਨਗਰ ਦਫ਼ਤਰ ਨੂੰ ਮਿਲੀ ਤਾਂ ਸਾਰੇ ਕਰਮਚਾਰੀ ਇਕੱਠੇ ਹੋਕੇ ਸਿਵਿਲ ਹਸਪਤਾਲ ਪਹੁੰਚੇ। ਐਕਸੀਅਨ ਮਨੋਹਰ ਸਿੰਘ ਵੀ ਪਹੁੰਚੇ, ਜਿਨ੍ਹਾਂ ਕਿਹਾ ਕਿ ਮੁਲਾਜ਼ਮਾਂ ਖ਼ਿਲਾਫ ਮਾਮਲਾ ਦਰਜ ਕੀਤਾ ਜਾਵੇਗਾ। ਕਰਮਚਾਰੀਆਂ ਵਿੱਚ ਕਾਫ਼ੀ ਰੋਸ ਪਾਇਆ ਜਾ ਰਿਹਾ ਹੈ।
