ਅਬੋਹਰ, 24 ਦਸੰਬਰ,ਬੋਲੇ ਪੰਜਾਬ ਬਿਊਰੋ:
ਅਮਰੀਕਾ ਦੇ ਕੈਲੀਫੋਰਨੀਆ ਵਿੱਚ ਡਰੱਗਜ਼ ਤਸਕਰੀ ਨਾਲ ਜੁੜੇ ਅਬੋਹਰ ਨਿਵਾਸੀ ਸੁਨੀਲ ਯਾਦਵ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਹੈ। ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਅਤੇ ਗੋਲਡੀ ਬਰਾੜ ਗੈਂਗ ਨੇ ਸੁਨੀਲ ਯਾਦਵ ਦੀ ਹੱਤਿਆ ਦੀ ਜ਼ਿੰਮੇਵਾਰੀ ਲਈ ਹੈ।
ਦੱਸਣਯੋਗ ਹੈ ਕਿ ਸੁਨੀਲ ਯਾਦਵ ਦੇ ਖਿਲਾਫ਼ ਰਾਜਸਥਾਨ ਦੇ ਜੋਧਪੁਰ ਵਿੱਚ 1 ਕੁਇੰਟਲ 20 ਕਿਲੋ ਹੀਰੋਇਨ ਦਾ ਮਾਮਲਾ ਦਰਜ ਸੀ। ਇਸ ਤੋਂ ਬਾਅਦ ਪੁਲਿਸ ਨੇ ਉਸਨੂੰ ਭਗੌੜਾ ਘੋਸ਼ਿਤ ਕੀਤਾ ਸੀ। ਸੁਨੀਲ ਯਾਦਵ ਦਾ ਪਿਤਾ ਪਿੰਡ ਵਰੀਆਮਖੇੜਾ ਵਿੱਚ ਪੋਸਟ ਆਫਿਸ ਵਿੱਚ ਨੌਕਰੀ ਕਰਦਾ ਹੈ। ਪਿਛਲੇ ਕਈ ਸਾਲਾਂ ਤੋਂ ਪਰਿਵਾਰ ਨਾਲ ਉਸਦਾ ਕੋਈ ਸੰਪਰਕ ਨਹੀਂ ਸੀ। ਇਸ ਤੋਂ ਇਲਾਵਾ, ਸੁਨੀਲ ਯਾਦਵ ਦੇ ਘਰ ’ਤੇ ਕਈ ਵਾਰ ਐਨਆਈਏ ਦੀ ਰੇਡ ਵੀ ਹੋ ਚੁਕੀ ਹੈ।
ਅਬੋਹਰ ਦੇ ਪਿੰਡ ਵਰੀਆਮਖੇੜਾ ਦਾ ਨਿਵਾਸੀ ਸੁਨੀਲ ਯਾਦਵ ਡਰੱਗਜ਼ ਦੀ ਤਸਕਰੀ ਨਾਲ ਜੁੜਿਆ ਹੋਇਆ ਵੱਡਾ ਖਿਡਾਰੀ ਮੰਨਿਆ ਜਾਂਦਾ ਸੀ ਅਤੇ ਉਹ ਪਾਕਿਸਤਾਨ ਤੋਂ ਡਰੱਗਜ਼ ਦੀ ਖੇਪ ਮੰਗਵਾ ਕੇ ਸਪਲਾਈ ਕਰਦਾ ਸੀ। ਲਾਰੈਂਸ ਗੈਂਗ ਦਾ ਦਾਅਵਾ ਹੈ ਕਿ ਸੁਨੀਲ ਯਾਦਵ ਪੰਜਾਬ ਪੁਲਿਸ ਦਾ ਮੁਖਬਿਰ ਸੀ ਅਤੇ ਉਹ ਗੈਂਗ ਨਾਲ ਜੁੜੇ ਬਦਮਾਸ਼ਾਂ ਦੀ ਹਲਚਲ ਦੀ ਜਾਣਕਾਰੀ ਪੁਲਿਸ ਨੂੰ ਦਿੰਦਾ ਸੀ।
