ਮੋਹਾਲੀ ‘ਚ ਪਲਾਟ ਦਿਵਾਉਣ ਦੇ ਨਾਂ ‘ਤੇ ਠੱਗੀ, ਐਡਵਾਂਸ ਲੈਣ ਤੋਂ ਬਾਅਦ ਦਫਤਰ ਅਤੇ ਫੋਨ ਸਵਿੱਚ ਆਫ ਕਰਕੇ ਇਕ ਲੱਖ ਰੁਪਏ ਹੜੱਪ ਲਏ
ਮੋਹਾਲੀ 10 ਨਵੰਬਰ ,ਬੋਲੇ ਪੰਜਾਬ ਬਿਊਰੋ :
ਪੰਜਾਬ ਦੇ ਮੋਹਾਲੀ ‘ਚ ਪਲਾਟ ਦਿਵਾਉਣ ਦੇ ਬਹਾਨੇ 1 ਲੱਖ ਰੁਪਏ ਦੀ ਠੱਗੀ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਐਸਐਸਪੀ ਮੁਹਾਲੀ ਦੇ ਹੁਕਮਾਂ ’ਤੇ ਖਰੜ ਸਦਰ ਪੁਲੀਸ ਨੇ ਇਸ ਮਾਮਲੇ ਵਿੱਚ ਔਰਤ ਸਮੇਤ ਦੋ ਮੁਲਜ਼ਮਾਂ ਖ਼ਿਲਾਫ਼ ਧੋਖਾਧੜੀ ਦਾ ਕੇਸ ਦਰਜ ਕਰ ਲਿਆ ਹੈ।ਜਾਣਕਾਰੀ ਅਨੁਸਾਰ ਸ਼ਿਕਾਇਤਕਰਤਾ ਗੁਰਮੀਤ ਸਿੰਘ ਵਾਸੀ ਲੁਧਿਆਣਾ ਸੈਕਟਰ-123 ਦੇ ਜੰਡਪੁਰ ਇਲਾਕੇ ‘ਚ ਪਲਾਟ ਖਰੀਦਣ ਦੇ ਇਰਾਦੇ ਨਾਲ ਗਿਆ ਸੀ। ਇੱਥੇ ਉਸ ਦੀ ਮੁਲਾਕਾਤ ਨੇਹਾ ਕੌਰ ਉਰਫ਼ ਨੇਹਾ ਸ਼ਰਮਾ ਅਤੇ ਉਸ ਦੇ ਸਾਥੀ ਵਿਸ਼ਾਲ ਬੈਨੀਪਾਲ ਨਾਲ ਹਾਕ ਰੀਅਲ ਅਸਟੇਟ ਕੰਪਨੀ ਦੇ ਦਫ਼ਤਰ ਵਿੱਚ ਹੋਈ। ਦੋਵਾਂ ਨੇ ਗੁਰਮੀਤ ਸਿੰਘ ਨੂੰ ਡਰੀਮ ਸਿਟੀ ਵਿੱਚ 100 ਗਜ਼ ਦਾ ਪਲਾਟ ਦਿਖਾਇਆ ਅਤੇ 30 ਲੱਖ ਰੁਪਏ ਵਿੱਚ ਸੌਦਾ ਤੈਅ ਕਰ ਲਿਆ।ਗੁਰਮੀਤ ਸਿੰਘ ਨੇ ਦੱਸਿਆ ਕਿ 8 ਜਨਵਰੀ ਨੂੰ ਜਦੋਂ ਉਸ ਨੂੰ ਪਲਾਟ ਪਸੰਦ ਆਇਆ ਤਾਂ ਉਸ ਨੇ ਗੂਗਲ ਪੇਅ ‘ਤੇ 10,000 ਰੁਪਏ ਅਤੇ ਵਿਸ਼ਾਲ ਨੂੰ 20,000 ਰੁਪਏ ਐਡਵਾਂਸ ਵਜੋਂ ਦੇ ਦਿੱਤੇ। ਇਸ ਤੋਂ ਬਾਅਦ 10 ਜਨਵਰੀ ਨੂੰ ਗੁਰਮੀਤ ਨੇ ਪੇਟੀਐਮ ਰਾਹੀਂ ਨੇਹਾ ਸ਼ਰਮਾ ਨੂੰ 38 ਹਜ਼ਾਰ ਰੁਪਏ ਟਰਾਂਸਫਰ ਕੀਤੇ ਅਤੇ 32 ਹਜ਼ਾਰ ਰੁਪਏ ਨਕਦ ਅਦਾ ਕੀਤੇ। ਇਸ ਤਰ੍ਹਾਂ ਉਸ ਨੇ ਕੁੱਲ ਇੱਕ ਲੱਖ ਰੁਪਏ ਦੀ ਐਡਵਾਂਸ ਰਕਮ ਅਦਾ ਕੀਤੀ ਸੀ। ਨਾਲ ਹੀ ਦੋਵਾਂ ਧਿਰਾਂ ਵਿਚਾਲੇ ਇਹ ਫੈਸਲਾ ਹੋਇਆ ਕਿ 20 ਮਾਰਚ ਨੂੰ ਪਲਾਟ ਦਾ ਐਗਰੀਮੈਂਟ ਕੀਤਾ ਜਾਵੇਗਾ।
