ਮਹਿਲਾ ਮਿੱਤਰ ਨਾਲ ਜਨਮਦਿਨ ਮਨਾਉਣ ਲਈ ਖਰੜ ਦੇ ਗੈਸਟ ਹਾਊਸ ‘ਚ ਠਹਿਰੇ ਵਿਅਕਤੀ ਦੀ ਸ਼ੱਕੀ ਹਾਲਾਤਾਂ ‘ਚ ਮੌਤ
ਖਰੜ, 21 ਅਗਸਤ,ਬੋਲੇ ਪੰਜਾਬ ਬਿਊਰੋ ;
ਇੱਕ ਵਿਅਕਤੀ ਜੋ ਆਪਣੀ ਮਹਿਲਾ ਦੋਸਤ ਨਾਲ ਆਪਣਾ ਜਨਮ ਦਿਨ ਮਨਾਉਣ ਲਈ ਗੈਸਟ ਹਾਊਸ ਵਿੱਚ ਠਹਿਰਿਆ ਸੀ, ਦੀ ਸ਼ੱਕੀ ਹਾਲਾਤਾਂ ਵਿੱਚ ਮੌਤ ਹੋ ਗਈ। ਖਰੜ ਸਿਟੀ ਪੁਲੀਸ ਨੇ ਪੋਸਟਮਾਰਟਮ ਮਗਰੋਂ ਲਾਸ਼ ਵਾਰਸਾਂ ਹਵਾਲੇ ਕਰ ਦਿੱਤੀ ਹੈ।
ਜਾਣਕਾਰੀ ਅਨੁਸਾਰ ਬੀਤੀ ਰਾਤ ਕਰੀਬ 9.30 ਵਜੇ ਇਕਵਿੰਦਰ ਸਿੰਘ (39) ਵਾਸੀ ਪਿੰਡ ਨਾਗਾਵਾਂ ਬਸੀ ਪਠਾਣਾ ਜ਼ਿਲ੍ਹਾ ਫਤਿਹਗੜ੍ਹ ਸਾਹਿਬ ਆਪਣੀ ਮਹਿਲਾ ਦੋਸਤ ਨਾਲ ਆਇਆ ਸੀ।ਉਸ ਨੇ ਪਹਿਲਾਂ ਹੀ ਗੈਸਟ ਹਾਊਸ ਦੇ ਸੰਚਾਲਕ ਨੂੰ ਜਨਮਦਿਨ ਮਨਾਉਣ ਲਈ ਦੋਵਾਂ ਦੇ ਰੁਕਣ ਬਾਰੇ ਕਿਹਾ ਸੀ। ਦੋਵਾਂ ਨੇ ਜਨਮ ਦਿਨ ਮਨਾਉਣ ਲਈ ਰੁਕਣ ਲਈ ਕਿਹਾ।ਉਨ੍ਹਾਂ ਨੇ ਸਵੇਰੇ ਫਤਿਹਗੜ੍ਹ ਸਾਹਿਬ ਜਾਣਾ ਸੀ ਪਰ ਕਰੀਬ 5 ਵਜੇ ਪ੍ਰੇਮਿਕਾ ਨੇ ਦੱਸਿਆ ਕਿ ਇਕਵਿੰਦਰ ਸਿੰਘ ਕਾਫੀ ਸਮੇਂ ਤੋਂ ਵਾਸ਼ਰੂਮ ‘ਚ ਬੰਦ ਹੈ ਅਤੇ ਦਰਵਾਜ਼ਾ ਨਹੀਂ ਖੋਲ੍ਹ ਰਿਹਾ। ਵੀਡੀਓਗ੍ਰਾਫੀ ਕਰਨ ਤੋਂ ਬਾਅਦ ਵਾਸ਼ਰੂਮ ਦਾ ਦਰਵਾਜ਼ਾ ਤੋੜਿਆ ਤਾਂ ਦੇਖਿਆ ਕਿ ਉਹ ਬੇਹੋਸ਼ੀ ਦੀ ਹਾਲਤ ‘ਚ ਡਿੱਗਿਆ ਪਿਆ ਸੀ।
ਅਰਧ-ਨਗਨ ਅਵਸਥਾ ਵਿੱਚ ਸੀ ਅਤੇ ਇੱਕ ਟੀਕਾ ਵੀ ਪਿਆ ਸੀ। ਲੜਕੀ ਨੇ ਕੈਬ ਦਾ ਪ੍ਰਬੰਧ ਕੀਤਾ ਅਤੇ ਸਵੇਰੇ 7.10 ਵਜੇ ਉਸ ਨੂੰ ਸਿਵਲ ਹਸਪਤਾਲ ਖਰੜ ਲੈ ਗਏ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਸ ਮੁਤਾਬਕ ਪੋਸਟਮਾਰਟਮ ਦੀ ਰਿਪੋਰਟ ਆਉਣ ਤੋਂ ਬਾਅਦ ਹੀ ਮੌਤ ਦੇ ਕਾਰਨਾਂ ਦਾ ਪਤਾ ਲੱਗੇਗਾ। ਥਾਣਾ ਸਿਟੀ ਤੋਂ ਜਾਂਚ ਅਧਿਕਾਰੀ ਲਖਵਿੰਦਰ ਪਾਲ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਅਨੁਸਾਰ ਇਕਵਿੰਦਰ ਸਿੰਘ ਖਰੜ ਕੁਰਾਲੀ ਰੋਡ ‘ਤੇ ਸਥਿਤ ਇਕ ਸੁਸਾਇਟੀ ‘ਚ ਬਤੌਰ ਸੁਰੱਖਿਆ ਗਾਰਡ ਦਾ ਕੰਮ ਕਰਦਾ ਸੀ। ਉਹ ਪਹਿਲਾਂ ਹੀ ਵਿਆਹਿਆ ਹੋਇਆ ਸੀ ਜਿਸਦੀ ਪਤਨੀ ਉਸਨੂੰ ਛੱਡ ਕੇ ਚਲੀ ਗਈ ਸੀ ਅਤੇ ਉਸਦੀ ਆਪਣੇ ਪਰਿਵਾਰ ਨਾਲ ਵੀ ਨਹੀਂ ਬਣਦੀ ਸੀ।
