ਜੋਧਪੁਰ, 15 ਜੁਲਾਈ, ਬੋਲੇ ਪੰਜਾਬ ਬਿਊਰੋ :
ਰਾਜਸਥਾਨ ਦੇ ਜੋਧਪੁਰ ਵਿੱਚ ਮੈਡੀਕਲ ਵਿਦਿਆਰਥੀਆਂ ਨੇ ਦੁੱਧ ਨਾਲ ਭਰਿਆ ਟੈਂਕਰ ਲੁੱਟ ਲਿਆ ਅਤੇ ਡਰਾਈਵਰ ਦੀ ਕੁੱਟਮਾਰ ਵੀ ਕੀਤੀ। ਜਿਸ ਤੋਂ ਬਾਅਦ ਉਹ ਟੈਂਕਰ ਨੂੰ ਕੁਝ ਦੂਰੀ ‘ਤੇ ਛੱਡ ਗਏ।
ਪੁਲਿਸ ਨੇ ਟੈਂਕਰ ਬਰਾਮਦ ਕਰ ਲਿਆ ਹੈ ਅਤੇ ਲੁੱਟ ਦਾ ਮਾਮਲਾ ਵੀ ਦਰਜ ਕਰ ਲਿਆ ਹੈ। ਇਸ ਮਾਮਲੇ ਵਿੱਚ ਤਿੰਨ ਵਿਦਿਆਰਥੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਹ ਸਾਰੀ ਘਟਨਾ ਸੀਸੀਟੀਵੀ ਕੈਮਰੇ ਵਿੱਚ ਵੀ ਕੈਦ ਹੋ ਗਈ ਹੈ।
ਇਹ ਘਟਨਾ ਐਤਵਾਰ ਨੂੰ ਮਥੁਰਾ ਦਾਸ ਮਾਥੁਰ ਹਸਪਤਾਲ ਦੇ ਬਾਹਰ ਵਾਪਰੀ। ਪੁਲਿਸ ਨੇ ਦੱਸਿਆ ਕਿ ਰਾਵੇਰ ਪਿੰਡ ਦਾ ਰਹਿਣ ਵਾਲਾ ਸੁਖਦੇਵ ਬਿਸ਼ਨੋਈ ਬੋਲੈਰੋ ਦਾ ਡਰਾਈਵਰ ਹੈ। ਉਸ ਦਾ ਟੈਂਕਰ ਸਰਸ ਡੇਅਰੀ ਵਿੱਚ ਦੁੱਧ ਦੀ ਸਪਲਾਈ ਵਿੱਚ ਲੱਗਾ ਹੋਇਆ ਹੈ। ਘਟਨਾ ਵਾਲੇ ਦਿਨ ਉਹ ਸਵੇਰੇ ਸਾਢੇ ਚਾਰ ਵਜੇ ਟੈਂਕਰ ਵਿੱਚ ਦੁੱਧ ਸਪਲਾਈ ਕਰਨ ਜਾ ਰਿਹਾ ਸੀ। ਜਦੋਂ ਉਹ ਏਡੀਐਮ ਹਸਪਤਾਲ ਦੇ ਗੇਟ ਨੰਬਰ 1 ਨੇੜੇ ਪੁੱਜੇ ਤਾਂ ਮੈਡੀਕਲ ਕਾਲਜ ਦੇ ਵਿਦਿਆਰਥੀਆਂ ਨੇ ਟੈਂਕਰ ਨੂੰ ਰੋਕ ਲਿਆ। ਵਿਦਿਆਰਥੀਆਂ ਨੇ ਡਰਾਈਵਰ ਨੂੰ ਹੇਠਾਂ ਉਤਾਰ ਦਿੱਤਾ ਅਤੇ ਦੋ ਵਿਦਿਆਰਥੀ ਟੈਂਕਰ ਦੇ ਅੰਦਰ ਬੈਠ ਕੇ ਉਸ ਨੂੰ ਭਜਾ ਕੇ ਲੈ ਗਏ, ਜਦਕਿ ਤਿੰਨ ਵਿਦਿਆਰਥੀ ਡਰਾਈਵਰ ਨੂੰ ਫੜ ਕੇ ਖੜ੍ਹੇ ਸਨ।
ਪੀੜਤ ਡਰਾਈਵਰ ਨੇ ਆਪਣੇ ਠੇਕੇਦਾਰ ਰਾਕੇਸ਼ ਬਿਸ਼ਨੋਈ ਅਤੇ ਪੁਲਿਸ ਨੂੰ ਘਟਨਾ ਦੀ ਸੂਚਨਾ ਦਿੱਤੀ। ਜਿਸ ਤੋਂ ਬਾਅਦ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਨੂੰ ਹਸਪਤਾਲ ਤੋਂ ਕੁਝ ਦੂਰੀ ’ਤੇ ਦੁੱਧ ਨਾਲ ਭਰਿਆ ਇੱਕ ਟੈਂਕਰ ਖੜਾ ਮਿਲਿਆ, ਜਿਸ ਨੂੰ ਥਾਣੇ ਲਿਆਂਦਾ ਗਿਆ। ਟੈਂਕਰ ਡਰਾਈਵਰ ਸੁਖਦੇਵ ਬਿਸ਼ਨੋਈ ਨੇ ਮੈਡੀਕਲ ਵਿਦਿਆਰਥੀ ਵਿਕਾਸ ਬਿਸ਼ਨੋਈ, ਓਮ ਪ੍ਰਕਾਸ਼ ਜਾਟ, ਮਹੇਸ਼ ਬਿਸ਼ਨੋਈ ਪ੍ਰਕਾਸ਼ ਅਤੇ ਦੋ ਹੋਰਾਂ ਖ਼ਿਲਾਫ਼ ਕੇਸ ਦਰਜ ਕਰਵਾਇਆ ਹੈ। ਇਸ ਤੋਂ ਬਾਅਦ ਤਿੰਨੋਂ ਮੈਡੀਕਲ ਵਿਦਿਆਰਥੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਅਤੇ ਦੋ ਦੀ ਭਾਲ ਜਾਰੀ ਹੈ।
